International Biological Diversity Day hman a ni

Nimin kha International Biological Diversity Day a ni a, he Ni puala programme chu Mizoramah pawh hman a ni a, Mizoram State Diversity Board leh Environment, Forests & Climate Change Department te ṭangkawpin he hun hmanna programme hi Conference Hall, Assembly Annexe Building ah an buatsaih.
He huna khuallian tura beisei Chief Minister Pu Lal Thanhawla chu damlohna avangin  a tel thei lova, Assembly Deputy Speaker Pu R. Lalrinmawia, MLA ṭhenkhat te leh Deapartment hrang hrang aiawhten programme hi an hmanpui a ni.

He Ni puala CM thuchah chu Principal Secretary to Chief Minister leh programme kaihruaitu Pu Laram Thanga’n a chhiarchhuak a, CM thuchahah hian mihring pung chho zelin mamawhna hrang hrang a tih  pun thu te, chu chuan hmasawnna kalpui lamah ramngaw a tihchereu thu te, dimdawia nungcha leh ramngaw enkawl a pawimawh leh a ṭul thu te tarlan a ni a. Mizoram chu zirmiten nungcha hausakna neihna hmun ‘biodiversity hotspots’ ah an ngaih thu te, heng rohlu, ramngaw mawi tak te, lui dung leh nungchate leh nunna nei dang chitin reng te duatin humhalh chuan ram thil neih (asset) hlu leh tlo berah a chhuah theih thu te leh ramngaw leh a chhunga cheng nungcha te hi khualzin hip theihna hmanraw tha tak a nih theih thu te a thuchhahah hian tarlan a ni bawk.

Assembly Speaker Pu R. Lalrinawma’n Mizoram University in nungcha hrang hrang hausak dan leh a chhinchhiahna bu an siam People’s Biodiversity Register a tlangzarh a, Kumina Day thupui ‘Biodiversity and Sustainable Tourism’ hmangin Dr. Samuel Lalronunga, National Postdoctoral Fellow, Department of Zoology, Pachhunga University College leh ‘Mammalian Diversity of Mizoram essential tool for Sustainable Tourism’ tih thupui hmangin Dr. Lalthanzara, Asst. Professor, PUC ten thusawina neiin thil pawimawh te an tarlang.

He ni puala Photography Competition a titha te hnenah Pu Rosiama Vanchhawng, PCCF in lawmman a sem a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram