Champhaia hri vanga vawk thi sample endik turin Aizawlah la

Champhai-a chhan hriat lohva vawk thi leh damlo taksa them chu endik tura lak chu vawiin hian Aizawl-ah a thlen rin a ni.
Animal Husbandry & Veterinary Secretary Pu B.Lalthan-liana sawi danin Champhai khuaah hian vawk engemaw-zat a thi a, a damlo bawk tih thu an dawng a, AH & Vety department hnathawkte chu heng vawk thi leh damlote taksa them hi endik tura la tura hrilh an ni a, an lak khawm hi Aizawl lamah an thawn dawn a ni.

Vawk thi leh damlo hri vei hi enge hriat a la ni lova, a thite hi vawk neitute’n an phum nghal zel avangin a sample lâk hleih theih a ni lova, damlote sample erawh lak a nih thu Pu B. Lalthanliana chuan a sawi.

AH & Vety department Secretary chuan he vawk natna hi PRRS nge a nih a, vawk pul hri pangngai (classical swine fever) tih chu endik hnu-ah chauh sawi theih a nih tur thu a sawi a ni.

Hetihlai hian Champhai District Vawkvulh Association hotute chuan Champhai Veng-lai leh a chhehvelah hian vawk 25 aia tlêmlo chu tunhnai aṭang khan a thi tawh niin an sawi a, he vawk pul hri hi kar hmasa lam aṭanga darh ṭan kha niin an sawi. An pawl Secretary Pu Lalrinzuala chuan vawk thite hi rei pawh damlo hman lovin an thi mai zel niin a sawi a, a natna hi a rang hle niin a sawi.

Nimin khan Champhai District Vawkvulh Association member-te hi inhmukhawmin, vawk pul hri len chungchanga inrawn khawmin sawrkar aṭanga ṭanpuina ngen dan turte an rel a ni.

Nikum khan Porcine Reproductive and respiratory Syndrome (PRRS) avangin Mizorama district paruk-ah vawk leh vawkte 4,000 dawn a thi a, Champhai district-in tuar nasa berin vawk leh vawkte 3000 chuang an chân a ni.

Champhai leh a chheh velah hri leng avanga Vawk thi a awm thu hriat a nih avang hian Champhai Bawrhsap Pu Van-lalngaihsaka chuan an district chhungah ram dang atanga vawk lakluh khapna a chhuah tawh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram