Tunhnaia ruahsur nasa avangin nunna chân 12 awm

Tunhnai Mizo-rama chhumlo chat lova ruah-pui vanawn sur avang khan mi 12-in nunna an chan tawh a, in 877 a chhe tawh bawk.
Disaster Management & Rehabilitation department-in tun thla ni 9 leh ni 13 inkara ruahsur nasa avanga Mizo-rama chhiatna thleng an lak-khawm dan chuan Aizawl district bikah hian in a puma chhia 18 awmin tlêm azawng chhia 65 a awma, chhiatna thleng avang hian mi pakhatin nunna chânin mi 2 in hliam an tuar a ni. Heng bakah hian kawngpui hmun 6 ah leimin vangin a ping a ṭhenkhat chu siamṭhat a sial tlang leh tawh a ni. Lunglei District ah chuan Tuilian leh leimin vangin In a vaia chhia 165 awmin in ṭhenkhat chhia 299 a awma, chhiatna thleng avanga nunna chân mi 10 awmin, mi 4 in hliam an tuar a, Chawngteah ni 15 aṭanga chin hriat loha bo pakhat awmin, ani hi Tuilian ina a lak rin a ni bawk. Heng bakah hian Lunglei District ah hian Sawrkar builing pahnih a chhe bawk a, kawng-pui hmun 5 ah leimin in a tichhia a, lei 2 a chhe bawk a ni.

DM&R hotute sawi danin Lawngtlai district-ah chuan leimin leh leikhi avangin In 51 chu luahtlak lohin a chhe vek a, In 280 te chu hmun ṭhenkhat lai chhia anga chhinchhiah a ni a, sawrkar building 3 a chhe bawk a ni. Lawngtlai bikah hian leimin vangin kawngpui hmun 15 ah a chhia a, tun dinhmun ah chuan heng kawngpui chhia leh leimin ina a hnawh te hi a tam zawk chu thenfai leh tawh an ni.

Siaha, Champhai, Kolasib, Serchhip leh Mamit District ah te ruahsur nasa vanga chhiatna a ziaawm deuha heng district 5-ah te hian in chhe vek 6 awmin in a ṭhenkhat lai chhia 23 a awm a, Serchhip district-ah pakhat a boral a, hei hi Khumtung daia kawng chhak leiminin a hnawl lirtheia chuang a ni.

Ruahsur nasa kaihhnawiha chhiatna tuar chhungkua hi 651 an awm a, thlai chinna hmun hrang hrang ram hectare 137 a zau a chhia a, Kolasib leh Serchhip district-ah a ni hlawm a, sangha dil 62 a chim chhia a, Kolasib district ami vek a ni.

DM&R Department chuan chhiatna thlen dan kimchang hriat zung zung a harsa a inkalpawhna leh inbiakpawhna te duh anga a ṭhat tawk loh avangin report dawn a harsa tih an sawi a, hei vang hian hei aia chhiatna thleng report hi ala tam thei nia sawiin, sawrkar hmalaknain National Disaster Management Authority te nen pawh chhiatna thlen dan nitin chanchin an inhrilh tawn reng bakah NGO World Vision leh Spire te pawhin harsatna thleng te chu a theih dan dana ṭanpuina kalpui turin an inbe pawp reng bawk a ni a ti a. Chawmdawlna hna chu a rang thei ang bera kalpui sawrkarin an tum thu DM&R Director Pu N Chakhai chuan a sawi bawk.