Cheng nuai 2126.01 senga sak Serchhip Auditorium hawn a ni ta

Nimin khan Chief Minister Pu Lal Thanhawla chuan cheng nuai 2126.01 senga sak Serchhip Auditorium a hawng.
Auditorium thar hawnna inkhawm Main Auditorium a buatsaih ah thu sawiin Chief Minister Pu Lal Thanhawla chuan ringtute chu an kalphung reng reng Pathian lam ṭang a ni tur a ni a ti a, tunhnaia Doctor sawn chungchanga Serchhip JAC te hmalakna chu a Kristian a, a lawmawm a ni a ti a.

Chief Minister chuan economy lamah kan insiam chhoh a ngai tih sawiin, NLUP kal zel chungin a belhchah nan leh rahbi tleu leh la hlawhtling lote ṭanpui turin NEDP kalpui mek anih thu te leh ei che che economy aṭanga market econnomy-a Mizoram hruai luh chu a tum ber anih thu a sawi a, Myanmar nena insumdawn tawnna chu tihṭhat a nih thu a sawi a, Border Trade te chu sumdawnna a nih rualin chanchinṭha hrilna zau zawk a inhawn an beisei tih sawiin, Border trade an buatsaih te chu chanchinṭha hrilhna tur ngaihtuah chunga an buatsaih a nih thu a sawi a, Border trade chungchangah hian sawrkar laipui pawhin an tan a ṭha dawn tih hria-in an phûr hle tawh a ni a ti bawk.

Chief Minister chuan CAG Report chungchang sawiin, he Report-a baseline survey ti lo anga ziak hi thu dik lo a ni a, YMA in khawtinah baseline survey felfai takin an ti tih sawiin, Mizoramah an zahawmna an tihniam a ni a ti a, hetianga an kal zel chuan India ram an tichhe mai ang tih a hlauhawm a ni tiin, hemi chungchang hi Union Finance Minister hnenah pawh sawi a tum thu a sawi bawk.

Serchhip Auditorium thar, Mizorama Auditorium ṭha ber leh lian ber nia ngaih hawn a ni ta chu bial mipuite a lawmpui tih sawiin, Serchhip District hi ram laili a awm a nih avangin Department hrang hrangin hmalâkna an nei a, heng hma laknaah hian neitu rilru pu turin mipuite a chah a, bial entawn-tlak ni turin a sawm a, Auditorium thar chu Serchhip District mipuite ta a nih angin mipuite chu a enkawlna kawnga neitu rilru pua thianghliam leh tha taka dimdawi taka hmang turin a chah a ni.

Auditorium hawnnaah hian UD & PA Minister Pu Zodintluanga pawhin thu sawiin, Serchhip Auditorium sak hna chu a hun taka zawh anih loh avanga pawi a tih thu sawiin he thilah hian mipui leh sawrkar hriatthiamna a ngen a. Sawrkarin loneitu leh kuthnathawktute a ngaih paiwmawh rualin hmasawnna ruhrel duan leh sak pawh a ruala kal tur nia ngaiin tun kum 9 kalta khan nasa takin hmasawnna ruhrel hrang hrang Mizoram dung leh vanga siam leh sak a nih thu a sawi a, Serchhipah pawh chhungkaw 350 tan in sak sak a nih tawh thu leh tunah hian mi 1011 tan Housing for All hnuaiah in sak sak leh tum a ni a ti bawk.

Auditorium hawnna prog-ramme hi UD & PA Department, Secretary Dr. C. Vanlal-ramsanga’n kaihruaiin, Rev. R. Lalawmpuia’n hunserh a hmang a. Technical Report hi UD &PA Department, Director Pu Joseph H. Lalramsanga hnen atangin ngaihthlak a ni a. NBCC Ltd. General Manager Capt. Sharan pawhin thu a sawi a.Serchhip mipuite aiawhin Pu RK Sanghmingthanga, President, Sub-Hqrs. YMA, Serchhip pawhin thu a sawi a, Serchhip DC Pi Sangchhin Chinzah-in lawmthu sawiin hun a khâr a, he hun hi Pu Chalrosanga, MLA pawhin a hmanpui a ni.

Serchhip Auditorium project hi kum 2009 khan sanctioned niin hun engmaw chen sak a nih hnuin a contractor hmasa zawk chu hna a thawh ṭhat theih loh avangin a hna tihtawpsak a ni a, November 2014 khan contractor thar hnenah a hna hi pek leh a ni a, Serchhip Auditorium sakna tur sum cheng nuai 2126.01 hi Ministry of Urban Development tum an niin Implementing Agency ah NBCC Ltd hman an ni a, a Nodal Department chu UD&PA Department an ni.

A building hi Mizo chhiara chawng thum niin, VIP Lounge, Office Room, Refreshment Room, Exhibition Hall, Meeting Hall lian tak pahnih, mi 1000 len theihna Main Auditorium changtlung tak, sound leh light te nena tel, Control Room leh Inthiarna te a awm a, Auditorium pumpui built up area hi square metre 3400 vel a ni a, DG Set 250 kVA leh Transformer 125 kVA te dah a ni bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram