World No. 1 Andy Murray pawhin Karen Khachanov hnehin a tum sarihna atan French Open Quarterfinal a thleng ve leh ta.
Murray hian darkar 2 leh minute 4 chhungin Khachanov hi straight set, 6-3 6-4 6-4-a hnehin last eight a thleng a. Kum 30 mi, Murray hian eight seed Japan star Kei Nishikori a hmachhawn leh dawn a, Murray hian hnehna a chan chu tun hnaia Manchester leh London khawpuia firfiaka chetna tuartute tan a hlan a ni.
British zinga French Open title la thei pakhat chiah a la awm a, chu chu Fred Perry niin, kum 1935-a a lak daih tawh kha a ni a, French Open-a Bristish record chhe tak hi Murray hian thaireh a tum mek a ni.
Hmeichhe lamah Second seed, Karolina Pliskova chuan World No. 97 Veronica Cepede Royg laka first set a hloh zet hnu-ah 2-6 6-3 6-4-a lehthal lehin Quarterfinal a lut a ni.
Third seed Simona Halep erawhin awlsam taka Carla Suarez Navarro hnehin Quarterfinal a lut a, Halep hian straight set 6-1 6-1-in darkar khat chhungin hnehna a chang a, Last eight-ah hian Fifth seed Elina Svitolina a hmachhawn dawn a, Svitolina, 22, hian 4-6 6-3 7-5-a Petra Martic hnehin Quarterfinal hi a lut a, Svitalona hi an inkhel laklawh lai hian a hnungzâng nâ enkawl a ngai a, final set-ah 2-5-a Martic-in hma a hruai hnu-ah a pawt thla leh a ni.
Fourth round inkhel dangah 28th seed Caroline Garcia chuan Alize Cornet chu 6-2, 6-4-in a hneh bawk a, hmeichhe lamah hian champion hlui inlan an awm lova, Maria Sharapova leh rai puar Serena Williams te an tel lova, inkhel entu pawh kum dang angin an \hahnem lo a ni.