YMA DAY 2017 THUCHAH

CENTRAL YOUNG MIZO ASSOCIATION
MIZORAM : AIZAWL

YMA DAY 2017 THUCHAH

Central YMA in Mizo mipui zawng zawng YMA DAY Vawi 82-na chibai kan buk e.

YMA din champha June 15, 2017 hi Mizoram Sorkar-in Pisa chawlhah min puan sak a, Sorkar chungah lawmthu kan sawi tak meuh a ni. Sorkarin pisa chawlha a puan remchanga hmanga pawl leh kohhran ten programme dang siam lova, he ni hi midangte tana inpekna ni a hmang theuh tur leh khua leh vengchhung tana tangkai taka hmang theuh turin pawl leh mitin kan ngen a, a hnuaia tarlan ang hian YMA Branch te leh mimal tinte chu ram leh hnam tan chhenfakawm, mimal tana nun kawng dik inzirtirna hun atan hmang theuh turin kan inbeisei a ni.

1. YMA DAY 2017 thupui atan ‘Ram leh Hnam humhalh’ hman nise, kan khawtlang theuhva a chhe lai leh siamthat ngaite siamtha turin hmalak ni se.

2. YMA hi tanpui ngaite tanpui tura pawl din a nih angin, vengchhunga mi harsa leh chhumchhiate dapchhuak a, a theih ang anga tanpuina hlan nise, YMA Branch tinah chenna in thawmthat ngai leh chhuanchham mai turte dapchhuak a, a theih leh remchan anga chhawmdawl turin kan ngen a, mite harsatna sut kiansakna ni leh mangangte tanpuina ni atan hman ni se.

3. Dam lo mangang tanpui ngaite thisen pe turin YMA Branch tinte leh mimal tinte kan inngen a, faina leh thianghlimna hi YMA ten kalphung ngheta kan lo neih tlat tawh angin, he ni denchhen hian vengchhung thenfai hnatlang neih ni se.

4. YMA Branch ten a remchan dan a zirin Hospital/Home/Centre-ah te tanpuina thilpek hlan nise. Tin, YMA In, Library, Lungphun, Signboard leh thil dangte tuaithar leh nise, YMA Hall te YMA rawng (flag rawng) a chei uar tum nise.

5. Thangtharte ah tlawmngaihna inzirtir thar leh nan hman tum nise. Tin, Mizo thuam inbel uar tura tan lak nan hman nise.

6. YMA Day-ah hian Branch huamchhungah hmun langsar lai takah Branch YMA Flag a ngul sang taka tar vek nise.

7. YMA kum 82-na hi hlim tak leh uar taka hmang turin Mizo mipui duhsakna kan hlan e.
Sd/- LALHMACHHUANA Sd/- LALBIAKZUALA
General Secretary President,
Central YMA Central YMA