BJP Mizoram Pradesh-in Governor an dem

BJP Mizoram Pradesh chuan Governor Nirbhay Sharma chu Chakma Autonomous District Council buaina chingfel tura a thiltih dan an dem tih an sawi.

Nimin khan BJP Mizoram Pradesh President, Prof. JV Hluna chuan Aizawlah thuthar thehdarhtute kawmin, Governor chu rinngam har an tih thu a sawi a, CADC-a sawrkar ding-lai hian kum 2013-a sawrkar a siam aṭangin mipui laka a chanvo theihnghiluin sum leh pai inchuhna leh eiruknaah a fihlim lo nghal niin a sawi a. An hruai-tute chu eirukna leh lalna inchuhin an hmanhlel a, CEM hmasa ber Dr. Budha Dhan Chakma chu thla 8 chhung chauh CEM a nih hnuah paihthlak a ni a. Amah thlaktu Pi Buddha Lilla Chakma pawh thla 18 chhung chauh CEM a nih hnuah paihthlak leh niin, tuna CEM aṭanga paih thlak leh tak Pu Kali Kumar Tongchongya khan CEM a nih aṭangin Sawrkar siam ṭhat tumin theihtawp a chhuah nghal a. A member pui mi 10-te chu dik lo taka Sawrkar sum an lo hmante huntiam chhunga rul tura a tih avangin thla 21 chhung CEM a nih hnuah paihthlak a ni ve leh ta nia sawiin, heng thil dik lo hrang hrang hi chhui chhuak a, a mawhphurtute hrem turin Governor chu a ngen tih a sawi.

Hemi chungchangah hian Governor chuan hma la ngei mahse, a thil tih dan chu tute emaw hum tumna ang mai nia an ngaih thu sawiin, CADC sawrkar chu ṭhiat tho si a, ni 7 chhunga sawrkar thar siamna hun a pek leh, eiruknaa fihlim lo MDC-te thuneihna pek chhunzawm a, anmahni an inveng thei ta maw tih veleh anmahni chhui chiang tura Lawngtlai DC ruat a ni chu an hrethiam lo tih sawiin, he thil phenah hian eng emaw a awm nia ngeiah BJP Mizoram Pra-desh chuan a ngai tih a sawi.

Prof. JV Hluna chuan CADC chungchangah hian BJP Mizoram Pradesh chuan a theih ang angin hma a la chhunzawm zel dawn tih a sawi a, CADC sawrkar dinglai chu ṭhiat a, a thara inthlanna buatsaih a nih theih nan hma an la dawn tih a sawi.