Spanish Garbine Muguruza chuan unseeded Slovakian Magdalena Rybarikova hnehin Wimbledon Final a thleng ta a, Final-ah hian ṭum 5 lo champion tawh Venus Williams emaw, Johanna Konta emaw a hmachhawn dawn a ni.
Kum 23 mi, Muguruza hian darkar 1 leh minute 4 chhungin Rybarikova hi 6-1, 6-1-in a hneh a, a ṭum hnihna atan Wimbledon final a thleng leh a, 2016 French Open champion hian Inrinni-ah Grand Slam a title pahnihna tur lak tumin a bei dawn a ni.
Final-a a hmachhawn tur hi Williams leh Konta te inkhela a chak zawk zawk an ni dawn a, Konta hian kum 1977 hnua Britain hmeichhe zinga Wimbledon final thleng leh hmasa ber nih a tum ang a, Williams hian kum 37 mi niin kum 9 hnuah Grand Slam title lak a tum ve thung dawn a ni.
Hetihlai hian mipa lamah Novak Djokovic chuan hliam vangin Wimbledon title a beisei thei ta lova, Quarterfinal-a Tomas Berdych nen an inkhelh laia a kiu-a hliam a neih avangin an inhnukdawk a, a inhnudawk lai hian Berdych hian 7-6 (7-2) 2-0-in hma a hruai a ni.
Champion lai Andy Murray chu quarterfinal-ah Sam Querrey chuan a vaw tla a, kum 29 mi, Querrey hian 3-6, 6-4, 6-7 (4-7), 6-1, 6-1-in hnehna a chang a, kum 2009 hnua American mipa zinga Grand Skan Semi-Final thleng leh thei hmasa ber a ni ta a, Murray hi a khel a tihnat avangin a khel hlei thei lo a, mahse a vanneih a siamin Djokovic a lo chak loh ve tho avangin World No. 1 a ni chhunzawm zel thei dawn a ni.
Querrey hian Semi-Final-ah Maric Cilic a hmachhawn dawn a, Cilic hian Semi-Final thleng turin Gilles Muller chu 3-6, 7-6 (8-6), 7-5, 5-7, 6-1-in a hneh a ni.
Roger Federer chuan 6-2, 6-4, 7-6-a Raonic hnehin Semi-Final a lut bawk a ni.