Mizoram Food & Allied Industries Corporation Limited (MIFCO) leh SLT Liana & Sons Zarkawt te chuan nimin khan MIFCO thei tuite mipuiten awlsam zawk leh chak zawk a an lei theihnan thawhdunna thuthlung an ziak.
He thawhdunna thuthlung-ah hian MIFCO aiawhin Managing Director Pu J.Hming-thanmawia chuan a hming a sign a, SLT Liana & Sons aiawhin Pu Stephen F.Laltawn-liana’n hming a sign bawk a ni.
MIFCO Chairman Pu PC Zoram Sangliana MLA hovin MIFCO in a thilsiamte chak zawkin ram chhung leh pawnah te kan hralh chhuah ang tih ngaihtuahho anih hnuah hetianga mimal nena thawh dun dan tur Public Private Partnership a hmalakna hi kalpui a ni ta a ni. Tun atang chuan MIFCO theituite hi SLT Liana & Sons –in a zuar tawh dawn a.Whole Sale a lei duh leh a hnuaia Distributor ni duh tan pawh an mahni hnenah biak zel a ngai tawh dawn a ni.
MIFCO hian sorkar hmalakna NLUP hnuaia Tuikum Cluster-ah Sapthei chingtute nen hma an la mek a. RKVY & NLUP Fund atangin Sapthei chingtu chhungkaw 620 hnenah tanpuina a pe a. Tunah hian chung sapthei chingtute nen chuan hmala dunin Chhingchhip a sapthei herna khawlah Sapthei tui an sawr mek zel a. Heta an siam chhuahte hi bottle-ah siamin hralh a ni a, Heng bakah hian a hlawmin State pawn lamah pawh hralh chhuah mek a ni bawk.
Sapthei chingtute hnen atangin kumin chhung hian kum kal ta 2015-16 chhungin qtl 1736.79 lei a ni. Kumin kum kal lai mekah hian quintal 2000 vel beisei a ni. MIFCO enkawl NLUP (Tuikum Cluster) hnuaia Sapthei Trade thlangtute zingah NLUP hmalakna hi zaa 73 in a hlawhtling a ni.
Sawrkar-in MIFCO chu changtlung zawka a kal theih nan tui thinghlim siamna bun turin a buatsaih mek a. Kumin Financial Year chhunga peih hman turin he project hi kalpui mek a ni bawk. Zemabawk a sa sawngbawlna pawh kumin chhung ngeia peih turin a kalpui mek bawk a ni.