MZP chuan Technical Course zir tur thlan chungchang buainaa zirlai hliamtuarte enkawlna senso July thla ralhma ngeia pe turin sawrkar an phut.
Inrinni khan MZP hruaitute chuan Aizawl Press Club-ah Press mite kawmin Mizoram quota-a technical course zir tur thlanna chungchanga buaina leh a kaihhnawihte an sawi a, MZP President Pu Lalsangzuala Ngente chuan ram leilung fate chauhvin Category-I aṭang hian an zir tur a ni tih chu MZP dinna a nih thu sawiin, chumi tur chuan Mizoram sawrkar a beiseiin a thlir reng dawn a, kum dangah buai ngai lova thil a kal theih nan ruahmanna siam turin MZP chuan Mizoram sawrkar a ngen tih a sawi.
Mizoram quota-a MBBS leh BDS zir tur thlan chungchangah hnam tana theihtawp chhuahtu zirlaite chungah MZP chuan lawmthu an sawi a, Mizoram quota-a technical course zir tur thlanna atana dan hman The Mizoram (Selection of Candidates for Higher Technical Courses) Rules-ah chuan zirlaite hi category pathumah ṭhen an ni a, ram leilung fate awmna tur Category-I-ah ram leilung fa ni lo dah an ni chu MZP chuan Mizo hnam tan him lo a tih bakah , hemi chungchang hi ngun taka ngaihtuah turin sawrkar hruaitute an phut a ni.
Category-I-a ram leilung fate dah theitu leh ram leilung fa ni lote dah theitu chu Mizoram sawrkar a ni a, MZP vawi tam a au tawh chunga Mizoram sawrkar a la harh thei lo chu pawi an tiin, zirlaite’n thisen chhuak khawpa an tawrh phahna chu vei turin Mizoram sawrkar an ngen thu an sawi bawk.
Hnam thil ngaihven tak Chakma te hian Mizoram quota-a technical course zir hrim hrim ai pawhin Category-I huanga awm hi an duh zawk ang tih pawh a rinawm tih sawiin tun ṭum thilah hian Chakma Minister Dr BD Chakma ṭhahnemngaihna avangin Mizo zirlaite hmachhawn turin police tam tham tak tirh an ni a, Mizo zirlaite’n Chakma minister vanga kut an tuar ta a ni an ti.
Hnam tana ding ngam zirlai Mizoram Police vuak hliam tuarte inenkawlna senso chu Mizoram sawrkarin a tum tur a ni tih chu MZP duh dan leh phut a ni a, zirlai hliam tuarte enkawlna senso hi sawrkar hian tun thla ralhma ngei a pek an phut thu an sawi a, nunrawng taka dimdawina tel lova zirlaite chunga kut thlaktu leh thu petu Mizoram Police te chu zawng chhuaka an phu tawk hremna turin sawrkar thuneitute MZP chuan a phut tih an sawi bawk.
Kar kalta Ningani-a Aizawla Police-te’n zirlai pungkhawm an hnawh darhna a hliam na zual pahnih – Enet Lalremruati, Govt. Aizawl North college zirlai leh Hav. Lalsawmliana Mizoram Police te chu nimin khan an kan a, Lalremruati hi a ban vuak auh a ni a, Hav. Lalsawmliana hi a hmaia vawm vanga hliam tuar a ni a, Police hliam hi Aizawl Civil Hospital-a ICU ah enkawl mek a ni a, Hliam tuarte hi MZP chuan an inenkawl na’n pawisa an hlan a ni.
MZP thuchhuahin a tarlan dan chuan he buaina-ah hian hriat theih china hliam tuar hi zirlai 22 vel an awm a. Zirlai hliam tuarte hi tun dinhmuna chuan na lutuk an awm hriat a ni lova, damdawi ina admit ngai an awm lo a ni. Mizorama police lama pawh hian Hav. Lalsawmliana bak hi chu hliam an awm lo ni a hriat a ni bawk a ni.