Aizawl Hospital leh Care Hospital, Aizawl te chuan RSBY-a bill tura BPL te an admit duh loh avangin Mizoram sawrkar chuan heng hospital pahnihte a recognise-na chu nimin aṭang khan a titawp.
Mizoram sawrkar chuan nimina hriattirna a tihchhuahah Aizawl Hospital & Research Centre, Khatla leh Care Hospital, Dawrpui te chu mi rethei zawk, BPL damlo te man man zawka an inentir theihna RSBY chu an pawm duh lova, sawrkar recognition atan hospital te’n RSBY hi an hman ngei a ngaih si avangin an recognition hi nimin aṭang khan a hlihsak ta a ni.
Health Secretary Pu Lalrinliana Fanai thuchhuah tarlan danin Mizoram sawrkar leh Mizoram State Health Care Society (MSHCS)-te’n RSBY hi hmang ve ngei turin Aizawl Hospital leh Care Hospital te chu an lo ngen tawh ṭhin a, mahse, damdawi in te hian an zawm duh lo a, July 11, 2017-a Chief Minister kaihhruaia Mizoram State Health Care Society Governing Body meeting chuan sawrkar ngenna an ngaih pawimawh duh loh avangin heng damdawi in te recognition chu a hlihsak ta a ni a ti.
Heng damdawi In pahniha sawrkar hnathawk leh an chhungte inekawlte chuan sawrkar-ah Medical Reimbursement an bill thei tawh dawn lo a, Sawrkar hnathawk ni lo te tan pawh Mizoram State Health Care Society ah pawh a bill theih tawh dawn loh ti a ni. Hetihlai hian notification chhuah a nih hma zawnga heng damdawi ina lo inentir tawh te erawh a huam lovang.