Chakma zirlai school kai tur dang

Mizo Zirlai Pawl Sub-Hqrs. Tlabung-ten, Government High School Tlabunga Chakma zirlaite chu vawiin khan school an kai tur an dang.

Tlabung MZP-te chuan, Govt High School, Tlabunga Chakma zirlai mipa ṭhenkhat chu mawi lo taka Mizo zirlai hmeichhe ṭhenkhat ṭawngkhum ṭhinah puhin pawi an tih thu an sawi a, Chakma zirlai mipa ṭhenkhat ṭawngkam vanga Mizo zirlai nu leh pate rilru a nat thu leh, hemi vanga buaina lian zawk a chhuah palh an hlauhthawn avangin nimin School kai tur Chakma zirlaite chu School aṭanga an hawtir thu an sawi.

MZP, Sub-Hqrs. Tlabung president Pu Vanlallawma chuan, Mizo zirlai hmeichhia-te rilru tina zawnga ṭawng-khumtute thil tih an dem thu leh, hnam dang zirlaite birth certificate endik vek an tum thu a sawi a, Govt High School, Tlabunga zirtirtute chu Mizo zirlai hmeichhia-te rilru tina thei tur zawnga ṭawngkhumtute zawng chhuaka an zirna chhunzawmtir tawh lo turin an ngen tih a sawi.

Govt. High School-a thil thleng chungchangah hian, nimin khan Tlabung Zodin venga Pi Lalbiakkimi’n Tlabung police station-ah thubuai a thehlut a ni.

Hetihlai hian Govt High School, Tlabunga thawktute chuan tun ṭum thil thleng chungchang an hriat lawk loh thu sawiin, pawi khawihtu-a puh zirlaite dapchhuaha a ṭul anga hmalak an tum thu an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram