Service Voter Online Registration kalpui dan zirhona nei

Nimin khan Serchhip District Bawrhsap Office-ah Serchhip District chhunga Electoral Roll khawihtu Officer ERO, AERO leh EO ten Election Commission of India in Service Voter Online Registration kalpui dan thar a ruahman te zirhona neih a ni a, District Election Officer, Pi Sangchhin Chinzah chuan a hmanpui.

Election Commission of India chuan, ram chhunga Service Voters registration chu a thar hlaka thlaka, Intensive Revision nei nghal tura ruahmanna a siam angin August ni 25 hmain Services Authority te chuan a thar vekin Voters Registration dilna an thehlut ang a, September ni 4-ah Draft Publication neih zui niin tun hmaa lo hman tawh Service Roll chu paih bo zui a ni ang. Draft Publication leh Form thar lut zawng zawngte chu AERO leh ERO ten an endikin, an kalna tur District, Constituency leh Polling Station te an thliar vek ang a, chu chu Chief Election Commission-ah an thawn thla ang a, anni lamin an lo zirchian hnuah District lamah ennawn tura thawn lehin, a dik leh dik loh enfiahna hi ṭum engemawzat an neih hnuah October ni 18 ah Final Publication neih tur a ni dawn a ni.

Heng hna zawng zawngte hi Electoral Roll buaipuina tur Computer Programme thar ERONet hmang veka thawh tur a ni dawn a, chumi hmanga a taka kalpui dan tur zirhona leh sawihona neih a ni a, Pu Abraham B Khithei, Election Officer Serchhip leh Pu Beithlotha Nohro, AERO ten EROnet hmanga Service Voters Registration kalpui dan hi presentation an pe a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram