Mizoram Police, Champhai District Executive Force te chuan niminpiah tlai dar 5 khan Sa-ek, Myanmar atanga lakluh cheng nuai 30 chuang man Heroin hawng 65 (Gram 894.3)-a rit chu Sesih dai-ah an man a, ruihhlo neitu a puh mi pakhat an man tel bawk.
Champhai Police hotute sawi danin, ruihhlo neitua puh Vanlalliana hian lirthei ke hnih nei chi hmangin Heroin hi ramri kan puiin, Sesih thleng a rawn phur lut a, Vanlalliana hian ruihhlo tawlhtu mi pahnih Myanmar leh Mizoram ami te inbiak remna anga Heroin hi ramri kâna rawn tawlhlut niin Police te hnenah a insawi a, Champhai Police te chuan ND & PS Act leh Foreigner Act tlawh chhanin Vanlalliana hi thubuai an siamsak a, nimin khan District Court-a hruai a nih hnuah Champhai District Jail-ah dah luh nghal a, Heroin hlut zawng hi tualchhung hralhna a chhut-in Cheng Nuai 30.50 man a tling.
Tunlai hian Myanmar atangin Mizoram-ah Heroin a lo lut nasa hle tih thudawnna chuan a sawi a, Champhai leh a chheh velah Police leh Excise & Narcotics lamten ruihhlo vaiin theihtawp chhuah bawk mahse, ram pahnih in kalpawhna khan hrang hrangah a lut reng a, Sub-Hqrs. YMA Champhai hruaitute chuan Myanmar atanga ruihhlo tawlhluh tihtawp dan kawng dapin Myanmar lam pawh an be mek bawk a ni.