Liverpool-in an midfielder Philippe Coutinho chu zawrh lai a ni lo tih an sawi aṭanga darkar khat hnu lekah amah Coutinho chuan chhuah dilna a thehlut.
Coutinho hian chhuah a duh thu hi email hmangin Club-ah hian a thawn a, Club hian an lo hnawlsak a ni.
Nilaini khan Reds hian Barcelona aṭanga £90m (Euro 100m)-a Coutinho lei dilna chu an hnawl a, kum 25 mi, Coutinho hi inhliam vangin vawiina Premier League-a Watford khel tura an zin chhuahnaah an hruai lo a ni.
Nimin khan Club chuan thuchhuah siamin Liverpool neitute chuan amah lei tuma dilna pawm lo turin an dinnaah an chiang tih an sawi a, hemi hma pawh hian Liverpool boss Jurgen Klopp chuan Brazilian forward hian a hnungzang nâ vangin season bul a ṭan thei dawn lo tih a sawi a, kar hmasa Zirtawpni aṭang khan training pawh a zawm tawh lo tih a sawi a ni.
Kum 2013-a £8.5m-a Inter Milan aṭanga Liverpool zawmtu, Coutinho hian season liam ta khan inelna hrang hrangah goal 14 a thun a, January thla kan kum 5 daih contract a ziak thar a, hetah hian release clause telh a ni lo a ni.
Liverpool hi an dinna ngaiah ding mahse player berin chhuah a duh thu a sawi takah chuan Coutinho hian Barcelona lam pawh a pan ngei a rinawm a ni.