MNF President Pu Zoramthanga chuan Citizenship Amendment Bill, 2016, Parliament-in thlasik inkhawma pharh a tum chu MNF Party chuan an do tlat dawn tih nimin khan Mizo Hnam Run chhung inkhawmah a sawi.
Pu Zoramthanga chuan Citizenship Amendment Bill 2016 hi Parliament-in a pawm chuan Dan a hman a ni tawh dawn a, kum 11 lo awm tawh tih chu kum 6-a tihtlem a nih tawh dawn avangin Bangladesh aṭanga Chakma rawn lut te chu danin a ngaidam dawn tihna a ni a ti a. A ngaihdam mai bakah India khua leh tui ni turin citizenship an dil thei anga, an dil anga pek an nih chuan Chakmate chu India khua leh tui, Mizo-ram mi dik tak nihna nei an ni tawh dawn a ni a ti.
Pu Zoramthanga chuan Chakmate chu Mizoram-ah Scheduled Tribe an nih sa avangin Mizote chanvo chauh ni tura a lo ngaih thin zawng zawng ah Chakma te nen hamthatna inang chiah a nei tawh dawn a ni a ti a, he Bill hi pass anih chuan Chakma, dan lova Mizorama rawn lut leh inbengbel zawng zawng deuhthaw chu Mizoram chhunga dan ang thlapa India khua leh tui nihna pek an ni dawn a, a nghawng chu a pawi hle dawn a ni a ti.
Hemi do tur hian India hmarchhak mi zawng zawng a sawm tih sawiin, Mizoram sorkar leh Party zawng zawng a sawm a, MNF in a duh dan chuan CYMA in All party, NGO zawng zawng, zirlai pawl leh sorkar hma la se a tih thu sawiin, signatur campaign neih a rawt bawk a. Citizenship Amendment Bill- 2016 chu MNF chuan a duh lo tak zat a, a tawp thlenga do an tum tih a sawi a ni.