Minister of State, Fisheries changtu Dr Buddha Dhan Chakma banna chu Governor Lt Gen Nirbhay Sharma chuan nimin khan a pawm a, Dr BD Chakma bânna hi Chief Minister Office chuan thawhlehni khan Governor hnenah a thawn tawh a ni.
Tarlan tawh Dr. BD Chakma hian Thawhṭanni khan Chief Minister Pu Lal Thanhawla hnenah bânna a thehlût a, a bânna lehkha a thehluhah hian Dr. BD Chakma hian Mizoram state qouta-a MBBS zir tura Chakma zirlai 4, National Eligibility cum Entrance Test (NEET) 2017 a tling ‘counselling’ tura koh te chu chhan engmah sawi lovin sut sak an ni a, hei bakah hian Higher & Technical Edn. Minister Pu R. Romawia’n MBBS quota chu Mizote tan chauh hauhsak a ni dawn a tih chu a a tan pawm theih a ni lo, a ti a. Mipui aiawha thlan tlin a nih avangin Minister of State a nih anga hma a laknaah state chhung mipui zawng zawngte chu hnam, sakhua leh rindan thliar hrang lova ang khata an rawng bawlsak vek chu a tih tur nia a ngaih avangin a hmalaknaah mi rilru a lo tina a nih chuan ngaihdam a dil a. Hetiang hi thil awmdan a nih avangin Minister a nih zui zel chu a rem lo nia hriain a banna a thehlut tih Dr. BD Chakma chuan a lehkhaah a ziak a, a banna chu lo pawmsak turin Chief Minister a ngen a ni.