Information & Public Relations Department bultuma Mizo artist pahnih Vanlalhriata leh ST Sailo ‘Duet Painting Exhibition’ buatsaih chu nimin khan Finance Minister Pu Lalsawta’n S&S Art Gallery, Lower Zarkawt-ah a hawng.
Khuallian Pu Lalsawta chuan hun engemaw chen aṭang tawhin Mizo artists ten lemziah leh a kaihhnawih lo ti tawh ṭhin mahse awmze nei deuha kalpui leh exhibition huaihawt te a hautak em avangin an ti hlei thei lo thin a, tunah chuan sawrkar zarah Nodal Department I&PR kaltlangin nasa takin hmasawnna hmuh tur a awm ta hi a lawmawm takzet a ni a ti. Harsatna karah Mizo artist-ten ke an lo pen tang tangna hi tihmasawn tur chuan mipui pawhin ngaihsanna leh ngaihhlutna chang an hriat a tul tih a sawi a. Hun lo kal zelah pawh Mizo art leh themthiamna hrang hrang chhawm nung reng tur chuan thangtharte zinga talent nei thate pawh chherchhuakin chawisan thiam a pawimawh a ni a ti.
Exhibition hawnna inkhawm kaihruaitu I&PR Director Pi Lalnithangi chuan kalkhawmte lawmna thu sawiin Mizo artist-ten hun harsa tak karah an lo beina leh an chhungten theih ang anga an lo tawiawm thinna rah chu exhibition hawn a ni thei ta hi a ni, a ti a. Mizoram sorkarin artist-te hmasawnna tur ngaihtuahin kum 2010 atangin budget-ah an pualin cheng nuai 10 dah a ni a, kumin budget-ah phei chuan a leta pungin cheng nuai 20 dah a ni ta chu Chief Minister Pu Lal Thanhawla leh Finance Minister Pu Lalsawta thahnemngaihna leh art hmasawnna an ngaih pawimawh vang a ni tiin an chungah lawmthu a sawi. Mizo artist-te chu huang khat ‘Mizoram Art Development Society’ (MADS) ah intelkhawmin dan (rules) fel taka siam a ni a, sorkar fund pawh MADS kaltlangin exhibition leh art workshop buatsaih nan hman a ni thin a; hei hian Mizo thalaite talent nei tha tak takte pawh tiphurin Art Degree leh PhD hial pawh nei an awm phah tawh a ni tih a tarlang bawk.
MADS President Pu HK Jerry Lalramliana chuan Exhibition-a lemziak phochhuahte thlirlawkna (preview) a nei a, Mizo artist-te chu hmasawn zel turin a fuih a. Mizoram sorkarin artist-te dinhmun chawikan nana I&PR kaltlanga a hmalakna hi an hlawkpui thu leh I&PR Director Pi Lalnithangi’n theihtawp a lo chhuahpui thinna leh phur taka an hmalaknate a thlawp thin chungah lawmthu a sawi bawk. Vawiina Duet Exhibition hawn takah Vanlalhriata chuan mite hriat phak lova beidawng taka awm thin Mizo lemziakte chu sorkarin a rawn hre pha a, an intununna tur leh state pawna artsist dangte nena ke pen rual thei tura a tanpui hi a vanneihthlak takzet a ni a ti bawk. Duet Painting Exhibition-ah hian Vanlalhriata kutchhuak 26 (Oil & Water) leh ST Sailo kutchhuak 36 (Oil) phochhuah niin ni 7-12 August 2017 thleng mipui en theihin hawn a ni ang.
Duet Painting Exhibition hawngtu Khuallain Pu Lalsawta hnenah S.T.Sailo chuan a lemziak 1 a hlan a, I&PR Director Pi Lalnithangi hnenah Vanlalhriata chuan a lemziak 1 a hlan bawk a ni.