Harsatna tam tak thleng mek MNF tih ni lovin Congress tih vek zawk a ni:Zoramthanga

Nimina Mizo Hnam Run chhung inkhawmah thusawiin MNF President Pu Zoramthanga chuan, Congress sawrkar sawiselna leh duhkhawp lohna mipuiin an sawi luai luai a, heng hi MNF-in an tihtir emaw, an sawitir emaw a ni lova, anmahni Congress tih vek zawk a ni a, MNF chuan zu zuar turin an ti lova, kawngpui pawh an tihchhiattir a ni lova, harsatna tam tak thleng mekte chu MNF tih ni lovin, anmahni Congress tih vek zawk a ni a, Kohhran khei zawnga Pu Hawla’n ṭawngkam a cheh pawhin Kohhran hruaitute chuan “Lo sawi ve mai mai teh se” an ti tawh niin a lang tawh hial a ni, a ti.

A sawizelnaah Pu Zorama chuan inremna zawnga an beihnaah VISA leh passport chungchangahte harsatna an tawk fo tih a sawi a, Pathian leh mipui zârah sawrkarna an chang leh a nih chuan Mizo kan nih avang leh kan hmel puthmangte a danglam deuh avanga India ram ngeiah pawh harsatna kan tawk fo chu tihbo an tum dawn a, India ramah rau rau pawh Mizoram mi kan ni tih chu chhuan tham a nih theih nan hma an la dawn tih a sawi bawk.

He hunah hian MNF President Pu Zoramthanga hian Pu Joseph Lalhluzuala Chinzah, J&J Employment Agency-a Managing Director chu MNF-ah a lawmlut a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram