MPCC Communication Department-in Pu Hawla’n a dawt a sawi tih an tilang chiang hle:PRISM

PRISM chuan thuchhuah siamin, August ni 26, 2017-a MPCC Communication Department-in thuchhuah an siam chuan President leh Mizoram Chief Minister nilai Pu Lal Thanhawla’n dawt a sawi ngei tih an tilang chiang hle tih an sawi.

PRISM chuan MPCC President leh Mizoram Chief Minister nilai Pu Lal Thanhawla’n a sawrkarin eiruk avanga mi 1,500 an hrem tawh thu a sawi chu PRISM chuan ropui an tih em avangin hriatchian duhin Chief Minister’s Office-ah RTI hmangin an hrem te hming kan dil a, CM Office hian chhan theih loh avangin Vigilance Department-ah an transfer a, Vigilance Department chuan eiru hrem mi 1,500 te hming hi an pe thei lo tih sawiin, hetiang a nih avang hian Pu Lal Thanhawla chuan thudiklo a sawiah an ngai tih an sawi a.

Hemi sawifiah tum hian MPCC Communication Department chuan thuchhuah a siam a, eirukna hi crime niin, eirukna hremna Dan, Prevention of Corruption Act hmanga hrem tur an nih anga hrem mi pakhat mah an neih sawi lovin, sawrkar hnathawk Dan bawhchhia te hremna Central Civil Service (Classification, Control and Appeal) Rules hmanga disciplinary action laa mi 1965 hrem an nih thu a sawi ta daih a, MPCC Communication Department hian an President leh Chief Minister nilai Pu Lal Thanhawla dawt sawi an lailang chiang hle-ah PRISM chuan an ngai tih an sawi a, mipui hruai kawi tuma thudiklo leh belhchian dawllo sawi bansana thudik chauh sawi tawh ṭhin turin ram hruaitu te an duh tih an sawi.

PRISM chuan Eiruk hremna Dan kan neih lai reng Prevention of Corruption Act hmanga inhrem ngam lo a, eirukna langsâr ber bera inhnamhnawih te pawh an chhuah zalen zel chu kan ramin hma kan sawn chak theih loh chhan a ni tiin, PRISM chuan eiruk hmang te hrem ngei chu ram damna turah an ngai tih an sawi a, hma pawh an la nasa a, sawrkarin hma a lak duh tlat loh avangin mipui beisei ang dikna tundin hun a thleng thei lo tih an sawi a, hei vang hian dikna tungding tur sawr-kar siam an tum phah ta niin an sawi bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram