Dapchhuah khua intihbuainaa, khawtlangin an khua chhuahsan tura an tih, Pu Supana te chhungkua chu, tunah sipai venna hnuaiah 4th IR battalion headquarter Mamit Luangpawl-ah an awm mek.
August Ni 15 zana Dapchhuah khua a buaina chhuah dan Pu Supana nupui Pi Lalhmunliani sawidanin, a unaupa fapa kum 17 mi lengchhuak chu Dapchhuah MHIP President Pi Tanpuii fapa leh a ṭhianten lo sawisa-in, an sawisak lai, a pa in hmua, ṭhelh a tum chu, lo sawisa ve leh in a tukkhumah thingfaka vuak a ni a, chumi hnu, zanrei lamah an in leh a nu te in chu lunga vawm zui leh a ni ta a ni. Hemi zan vek hian, Pu Supana te motor Tripper 7, JCB 1, Pickup 1 te chu a darthlalang vawm keh vekin, hemi bakah hian an bike chu suasam telin,diesel leh petrol litres 2000 vel an leihbuak sak bawk a ni.
Pu Supana nupui Pi Lalhmunliani chuan hetianga an khaw mipui te chêt chhan hi a hriat loh thu leh ni 16 chhuna darkar 24 chhungin Dapchhuah khua chhuahsan tura intiamkamna lehkhaah hming an ziahtir thu a sawi a, 4th Bn. IR hotute chuan Pu Supana te chhungkua leh a pizawn te chhungkua 24 te chu an himna tur ngaihtuah puiin an hruaichhuah thu leh an camp chhunga inruak 1-ah an chentir rih thu an sawi.