MNF Vice President Pu R.Tlanghmingthanga chuan NIAS Kolkata leh Welfare Board chhuitir danah Congress sawrkar hian thudik pehhel a tum a, LE&IT Minister aṭanga bang Pu Lalrinmawia Ralte leh MYC chairman bang ta Pu T.Sangkunga te chu NIAS chungchangah an inrawlh ngei nia an hriat thu a sawi.
Nimina Aizawl Press Club-a thuthar lakhawmtute an kawmnaah MNF Vice President leh MNF Vigilance Committee Chairman ni bawk Pu R.Tlang-hmingthanga chuan NIAS Kolkata a zirlai tirh chung-changa thil diklo awm chhui turin Chief Minister Pu Lal Thanhawla chuan a nuphalpa a ruat a, dodalna a awm avangin sawrkara Secretary hnathawk laite ruat an ni chu thudik hmuh chhuah tum lo-ah Congress sawrkar an ngai tih a sawi a, Inquiry Commission hian tu thua NIAS nena MoU ziak nge an nih, kum 3 zir tur ni si, engvanga kum khat atan chauha MoU ziak nge an nih a, Welfare Board sum, cheng nuai 500 chuang chu tu thu a dan kalha hmang nge an nih tih MNF party chuan an zawt tih sawiin, NIAS hnena cheng nuai 128 chuang zet hi tu thu a ni 43 chhung leka pe tla nge an nih tih te chhui tura mipuiin kan ngaih laiin NIAS a zir tur thlan chungchanga Pu Lalrinmawia Ralte leh Pu T.Sangkunga te an inrawlh leh rawlh loh chhui tura an ti ta mai hi Tlawng vuaka Mat dap ang ni a an hriat thu a sawi a ni.
Pu R Tlanghmingthanga chuan LE&IT/Welfare Board hnuaia cheng nuai 500 chuang lai dan kalha hman leh zirna In lema zirlai 32 tirh an nih hnu leh sum siam nana Mizo zirlaite MYC-in a hman mawlh mawlh hnu pawha a changtu Minister leh MYC Chairman te mawhphurhna a nih loh chuan eng vanga LE&IT Minister leh MYC Chairman te hi bantir nge a nih tih chu sawifiah turin Chief Minister hian sawifiah thuai turin MNF party chuan an phut thu a sawi bawk.
Inquiry a chhui tur dik tak chhui tir si lo va Pu Lalrin-mawia Ralte leh Pu T.Sang-kunga te fihlim anga ngaih theiha ni 18.7.2017-a thuchhuah No C. 13018/2/2017-VIG Congress sawrkarin a siam tir ta mai chu âwm leh mawi pawh thlu lova an dik lohna thupbo an tumzia leh Mizo mipuite an zahlohzia an tilang chiang hle-a an ngaih thu an sawi.