Skip to content
Home » Chanchinthar » PSG-ah Neymar a lûtfel ta

PSG-ah Neymar a lûtfel ta

Paris St-Germain chuan Brazil forward Neymar chu World Record fee 222m euros (£200m)-in Barcelona aṭangin an lalutfel ta.

Kum 25 mi, Neymar hian record ding lai – Manchester United-in nikum August thlaa Juventus aṭanga Paul Pogba £89m-a an leina chu a khûm chiang hle a, Neymar hian kum 5 daih contract ziakin tax pek hma-in kum khatah 45m euros (£40.7m) – chawlhkar khatah 865,000 euros (£782,000) a hlawh dawn a, kum 5 chhung hian £400m vel a hlawh thei dawn a ni.

Neymar chuan mi tam takin sum vanga PSG a zawm nia an ngai chu a lawm loh thu sawiin, PSG a zawm chhan chu Europe-a Club hmasawn leh hlawhtlin tum ber pawl a nih vang tih a sawi a, “Paris St-Germain thil tum hian he Club-a lut tur hian min hip a ni,” tiin a sawi a, “Chona thar su turin ka inring tawh a. Vawiin aṭang hian ka team mate thar te ṭanpui turin ka theihna zawng zawng ka hmang dawn a ni,” tiin a sawi a, vawiina PSG-in Ligue 1-a an match hmasa ber an khelh turah Neymar hi a inlan ve thei nghal dawn a, Neymar chuan a man sâng tak chuan amahah phurrit a siam dawn lo tih a sawi bawk a ni.

Sum vanga PSG zawm nia an ngaih chungchang sawiin, Neymar chuan, “Heng mite hian ka mimal nuna thil an hriat lohah hi engtinnge ka hrilhfiah ang? Pawisa vanga phûr ṭhin ka ni lo,” tiin a sawi a, “Sum ûm ni ila chuan, hmun dangah, ram danga club dangah pawh ka kal ang chu. Hemi kawnga mite min rin dan hian min tilawm lo tak set a ni, PSG-in ka chunga rinna an nghat erawhin min tilawm a ni,” a ti bawk.

Leave a Reply

This site uses Akismet to reduce spam. Learn how your comment data is processed.