Ortiz hmachhawn turin WBO-in Joshua an hrilh

British heavyweight champion Anthony Joshua chu WBA chuan a title humhim tura Cuba boxer Luis Ortiz hmachhawn turin an ti.

Kum 27 mi, Joshua hi a title humhim turin Wladimir Klitschko nen rematch nei tur ni mahse Ukrainian boxer hian Ningani khan Boxing a chawlhsan thu a puang a, hemi hnu hian WBA chuan thupek chhuahin Joshua leh Ortiz te hi August ni 3 aṭanga chhiara ni 30 chhungin inhnek tura inremna siam turin an ti a ni.

April thlaa Wembley-a Klitschko hnehtu Joshua hi IBF title a kawl lai chu amah hmachhawntu tur Kubrat Pulev nen December ni 2 hmaa inhnek tura hrilh a ni bawk a, a nih loh chuan a title kawl lai chu hlihsak a ni thei dawn a ni.

Ruahman dan chuan Joshua hi Klitschko nen Las Vegas-ah November ni 11-a inhnek tur an ni a, Ortiz manager Jay Jimenez chuan Klitschko hmun ruak hi an luah nghal thei tih a sawi a, Jimenez chuan Boxingscene hnenah, “Keini hi a hmachhawn leh tur chu kan ni a, Las Vegas-a November ni 11-a inhnek tur hian harsatna kan nei lo a ni,” tiin a sawi.

Kum 38 mi, Ortiz hian mi 27 a hmachhawn zinga 23 chu knock-out-a a hneh an ni a, kum 36 mi, Pulev hian mi 26 a hmachhawn tawhah vawi khat chiah a la tlawm a, mi 13 a knock-out a ni.

Joshua hian Major belt 4 zinga pahnih a kawl a, New Zealand boxer Joseph Parker chuan WBO title kawlin, American boxer Deontay Wilder chuan WBC belt a kawl mek bawk a ni.