Conor McGregor chuan August ni 26-a an inhnekna turah glove zâng zawk, 8oz gloves hman phalsak a nih hnuah Floyd Mayweather Jr chu Round hnih chhunga a hneh tur thu a sawi.
Nevada State Athletic Commission (NAC) hian one-off rule thlakin glove size pawh 10oz aṭanga 8oz-a hman an phal tih an puang chiang a, hetianga 154lbs inhneka glove zâng zawk hman phal a ni ngai mang lova, 147lbs chin hnuai lam tan 8oz gloves hi hman a ni chauh ṭhin a, glove zâng zawkah chuan kut zungṭang invuahna ruh tuamtu kha a pan a, hnek pawh a na zawk a ni.
Kum 29 mi, UFC Champion, McGregor chuan, “Hetianga gloves thar hman phal a nih chuan Second Round bak a daih ka ring lo,” tiin a sawi a, “Round 12 inbei turin ka inring reng a, Second Round-a dah bo tur pawhin ka inpeih tawh a ni,” a ti bawk.
McGregor hian a tlangpuiin kutzungṭang nei lo Glove 4oz a bun ṭhin a, hetihlai hian Mayweather hian inhnek 49 a hmachhawn zinga 46-ah tuna an glove hman tur 8oz glove hi a hmang ṭhin a ni.