Serchhip-ah mumal zawka kalpui turin Zoram Exodus Movement din a ni ta

Inrinni zingkar khan Serchhipa Party zawm bik nei lo ram vei rual inhmukhawm te chuan mumal zawka kalpui turin Zoram Exodus Movement (ZEM) an din a, hruaitu tur pawh an inruat fel nghal.

July ni 6, 2016 khan Khawtetlang-a Tourist Lodge-ah mi ṭhahnem tak te chu tualchhung chanchinbumite leh Aizawl lam aṭanga ZEM hruaitu lawk te nen an lo inhmukhawm tawh a, hemi ṭum hian Serchhipa ZEM din chungchang hi sawiin, hma lo la turin Convener atan mi 3 – Pu Kapliana Pachuau, Pu Lalawmpuia Renthlei leh Pu Jerry Lalrintluanga te ruat an ni a, anni hian Serchhip khaw chhunga Prominent Citizen hrang hrang te an kawm kual hnuah Inrinni zing khan Convener te leh he lama mi ṭha-hnemngai te chu inhmukhawm lehin, hruaitu tur mumal takin an inruat fel ta a, President-ah Pu K.Chawiliana ruat niin, Vice President-ah Pu Lalchhara leh Pu Lalbiakliana te an ni a, Secretary-ah Pu Kapliana Pachuau niin, Treasurer-ah Pu Lalawmpuia Renthlei a ni.

Serchhipa ZEM President atana ruat Pu K.Chawiliana chuan he an inhmuhkhawm-naah hian thusawiin, “Pathian leh a Kohhran tana kan rinawmna aia Party-a kan rinawmna kan dah pawimawh zawk tlat reng mai hi a ngaimawhawm tawh em em a ni” a ti a, “Serchhip ZEM hi chuan Pathian leh Kohhran duhdanin ram siamṭhat hna a thawk zawk dawn a ni,” tiin, ZEM chu “Kohhran mipui leh rawngbawltute telna tlâk a ni dawn a ni,” a ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram