Serchhip District-a Private TV Channels viltu Committee ṭhukhawm

Nimin khan Serchhip District Level Monitoring Committee for Private Television Channels chu an Chairman Pi Sangchhin Chinzah, District Bawrhsap ni bawk hovin an thukhawm a. Hmalak dan tur hrang hrang an rel.

Chairman Pi Sangchhin Chinzah chuan, khawvel hmasawnna thang zelah Television hi a tangkai em em a, mitin tan hriatna hnar pawi-mawh tak pakhat a ni. Chutih-laiin TV te hi mipuite inkara inlungrual lohna te, hnam leh hnam, sakhua leh sakhua, chi leh chi inkara innghirnghona te, sawrkar thupek dodal zawnga hmalakna leh mimal pawi sawi zawngtea thil thehdarhtu a ni ve thei bawk a. Chutiang laka invenna tur inkaihhruaina dan pawh fel takin sawrkarin a ruahman a ni, a ti a. Chung dante chu Cable TV neituten an zawm tha em tih enfiahtu tur State Level leh District tinah sawrkar chuan a din ta a ni, a ti.

Nimin meeting hian Serchhip District mipuite chu Cable TV a tihchhuah thilah sawisel duh (complaint) an neih chuan he Committee ah hian a thlen theih a ni tih puanzar nise tiin a rel a. Member Secretary leh Serchhip DIPRO ni bawk chu Press Release hmanga lo puangzar tura ruat a ni a, Cable TV prog-ramme, sawrkar dan leh thupek tibuai thei (affecting public order) leh mipui lungawilohna/thinurna thlen thei chi (widespread resentment in community) a awm phei chuan State Level Committee ah a rang lama thlen vat ṭhin nise a ti a. District chhunga Cable TV Sub-Operator zawng zawngte chu District Monitoring Committee chungchang hrilhhriat vek nise a tih bakah Committee member te chu District chhunga TV Programme hrang hrangte uluk tak lo thlithlai reng thin turin a rel bawk.

District Monitoring Committee for Private Television Channels hi Cable TV prog-ramme (content) tihchhuah hrang hrangte viltu atan Mizo-ram sawrkar chuan September, 2016 khan District tinah a din a ni.