Nizan hmasa khan Mizo-ram ṭhalai Kristian Pawl hma-lakna bawhzuiin New Serchhip Unit ṭKP chuan ‘Campaign against human trafficking and drug abuse’ tih hmangin Talkshow an buatsaih a, hemi lama Serchhipa sawrkar hotu lian te leh tlawmngai pawl hotute an tel a, he hunah hian Mizoramah mihringa sum-dawnna / inrukbona (human trafficking) case la tlem mahse state pawnah erawh chuan human trafficking tuartu Mizo an tam hle tih sawilan a ni.
He Talkshow-ah hian Dr. Zarzosanga chu Moderator niin nia, panel member-ah hian Pu Lalringdika SP, Pi Lalnun-mawii Varte SDPO, Pu Zochhuana Excise OC, Pi Lal-siampuii, DCPO, Dr. C.Zodinmawii OST District Hospital, Pu R. Sanghmingthanga, President, Serchhip Sub Hqrs YMA leh Pi PC Zoliansangi, Project Manager, Drop-in Centre te an ṭhu a ni.
Thusawitute chuan Human trafficking hi Mizoten kan ngaihvena kan lo fimkhur lawk a ngai tih sawilan a ni a, lo inven lawk theihna tur atan awareness neih ṭhat te, human trafficking case awm ang ang leh dan bawhchhiatna reng reng thuneitute hnena up bo lova report vat ṭhin a ṭul thu te, nu leh pa, a bikin phaia fa dahten an fate thiltih hriatpui a ṭul thu te, hna zawnna leh zirna kawnga state pawna kal te mahni thu thu a kal mai lo leh hmelhriat loh ring mai lova, agency mumal tak kaltlanga hna zawn/zirna hmun zawn a ṭul thu te sawilan a ni.
He huna thu sawitute chuan ruihhlo, zu leh zuk leh hmuam chu kan thihpui nasat tawh avangin kan hnam hmelma dik tak a ni an ti a, Golden Triangle kan hnaih avang hian kan ramah ruihhlo tawlh luh hi a la tam chho zel dawn niin a a lang a, kan fimkhur a ngai a, ruihhlo ngai (addict) te hi misual an ni lova, ngawl veina (addiction) hi sualna ni lovin natna a ni a, chuvangin, Serchhip hospitala Opiod Substitution Therapy clinic te, drop-in centre te chu hman ṭangkai a ngai a ni an ti.
Kohhran, sawrkar, chung-kua leh khawtlang hian ruihhlo do kawnga tha thlah lova ṭanrual a ngai a, ruihhlo do hi hnam thil a ni a, mimal leh pawl khatin do hneh chi a ni lova, zavaia ṭanrual ngaihna thil a ni an ti a, ruihhlo ngaite chhawm-dawl leh enkawl kawngah revival/gospel campinga kan inhnawhlut ṭhin te, de-addiction centre a kan indah ṭhin te chu an thlarau nun chhandam nan a pawimawh avangin thil ṭha tak a ni a, chutih rualin an taksa chhanchhuak tur hian hetiang lama thiamna nei (counsellor etc) te chu hman uar deuh deuh a ngai tih an sawi bawk.
Zuk leh hmuam hi kan taksa mai ni lova, thlarau nun thleng khawih thil a ni a, chuvangin, sim theih a ṭhat thu an sawi a, Mizo te hian ruihhlo ang em ema zuk leh hmuam kan ngaih serious loh chhan chu ruihhlo anga kan nitin nunphung leh nunhona min tihbuai lem loh vang hi ni bera an hriat thu an sawi a, Zu chu a ṭhatna sawi tur a awm lova, chuvangin in loh tluka zu fakmawi dan a awm lo an ti a, ruihhlo leh zu ngawlvei te erawh misual ni lovin damlo, natna tuar an ni a, enkawl a, chhawmdawl an ngai tih an sawi bawk.
——————————————————-