Vettel-a’n hma a hruai-na a titam leh hret

Pathiannia Formula One Hungarian GP-intlansiak hmuhnawm takah Pole aṭanga bul ṭan Ferrari driver Sebastian Vettel chu pakhatna a ni a, a team-mate Kimi Raikkonen chu pahnihna niin, Mercedes driver Lewis Hamilton chuan a team-mate Vallteri Bottas chu kianin pathumna a nihtir a ni.

Intlansiak tawp dawn lamah Mercedes hotute chuan Hamilton chu Vettel leh Raikkonen ûm turin an ti a, a hmaa tlan Bottas chu kawng an kentir a, theihtawpin Hamilton chuan Ferrari car pahnih hi a ûm a, harsatna te siamsak viai viai ṭhin mahse a ûmphâk ta lo a, a tawpah Hamilton chuan Bottas chu kian lehin pathumna a nihtir ta a ni.

He intlansiak hmuhnawm takah hian Raikkonen chuan Vettel aia tlan chak thei a ni tih a sawi a, mahse an team-in Hamilton dang tura an ti tlat niin a sawi a ni.

Intlansiak danga tlan fuh hleithei lo Alonso erawh a tlan ṭha tak zet, fastest lap a siam nghe nghe a, paruknaah a thleng bawk a ni.

Driver Standings-ah Vettel chuan hma a hruai chhunzawm zel a, pahnihna Hamilton lakah point 14-in a fâl ta a, Bottas chu pathumna niin point 169 a nei a, Daniel Ricciardo chu palina niin 117 points a nei a ni.

Hungarian GP race result:
1) Sebastian Vettel (Ferrari) 1:39.713
2) Kimi Raikkonen (Ferrari) +0.908
3) Valtteri Bottas (Mercedes) +12.462
4) Lewis Hamilton (Mercedes) +12.885
5) Max Verstappen (Red Bull) +13.276
6) Fernando Alonso (McLaren) +71.223
7) Carlos Sainz (Toro Rosso) +1 lap
8) Sergio Perez (Force India) +1 lap
9) Esteban Ocon (Force India) +1 lap
10) Stoffel Vandoorne (McLaren) +1 lap

Drivers Championship Standing:
1 Sebastian Vettel (Ferrari) – 202 pts.
2 Lewis Hamilton (Mercedes) – 188 pts.
3 Valtteri Bottas (Mercedes ) – 169 pts.
4 Daniel Ricciardo (Red Bull) – 117 pts
5 Kimi Räikkönen (Ferrari) – 116 pts
6 Max Verstappen (Red Bull) – 67 pts
7 Sergio Perez (Force India) – 56 pts
8 Esteban Ocon (Force India) – 45 pts.