Tuikum luia tui tla Lawmzuala ruang la zawn mek zel a ni

Inrinni zing dar 6 vela Tuikum luia tla Pu Lawmzuala (30) S/o Kumara, New Serchhip Bazar Veng ruang chu hmuh a la ni lova, chhun zan zawmin mi tlawmngaiten an la zawng chhunzawm zel.

Pu Lawmzuala hi Tuikum ral, Vancheng ram lamah lo-a hnathawkin a riak a, Inrinni zing khan inlama haw chhuah tumin PHE Department tui lakna Tuikhuah ko tlangah Tuikum lui hi dai kai a tum a, Tuikum lui dai kai a tum lai hi Serchhip ram lama awm, PHE Department Pump House-a hnathawk te pawhin an lo thlir a, Tuikhuah chanve aia tam mah chu a kal tawh tihin Tuikhuah kotlang nâl leh tui khauh bawk si chuan a ke phetin tuikhuah kotlang aṭang chuan a thlang lamah a tla thla a, a tlak thlak hnu hian Tuikhuah ko thlangah hian a ding leh a, mahse tui a tam avang leh amah hi a talbuai deuh avangin tuiah hian a tla a, a thlang lamah Vancheng ram lam depah tui hian a len thla zui ta a, tui a len avang leh tuiin a lenna lam hi Vancheng ram lam a nih avangin a lo hmutu te tan pawh chhan ngaihna a awm lova, a hmutute hian khaw chhung lam an hrilh nghal a.

Pu Lawmzuala tui-ah a tla tih hriat a nih ve leh hian a ruang zawng turin hian mi tlawmngaiten Tuikum hi an pan khawm nghal a, a ṭhenin a tlakna lai, PHE Department Pump House lam an pan a, a ṭhenin lui mawng lamah a ruang tuiin a len thlak châng turin Vanchengkai lam an pan nghal bawk a, Inrinni khan a tlakna leh Vancheng kai inkar lui dungah mi tlawmngaiten ruang zawn hna an thawk a, life jacket ha chunga a tlâkna aṭanga tuia inlenthlaktira luia a ruang zawng an awm bawk a, Inrinni zan khan mi tlawmngai ṭhenkhatten lui dungah riahchilhin ruang zawn hna hi an thawk a, nimin lamah pawh mi ṭhahnem takin ruang zawng hian Tuikum lui dung an hrut zui zel a, mahse nimin tlaia he thu buatsaih lai thleng hian a ruang hmuh a la ni lo a ni.

Inrinni khan Vanchengte kai chhakah tuiin ruang a lenthlak danna tur Ngar hem tumin hma lak a ni a, lui chanve vel thleng chu siam theih ni mahse tui a tam avangin siam tluan theih a ni lova, nimin khan a tlakna aṭanga lui mawng lam kilometre khat vela hlaah, Pu Lawmhlira leilet bulah Ngar hem hna hi thawh leh a ni a, hei pawh hi zawhfel ṭep a nih laiin a chhak aṭanga hnawl lo chhuk-in a len chhe leh a, heti chung hian nizan khan mi tlawm-ngaiten riahchilhin ruang zawn hna hi an la thawk zui zel a ni.

Inrinni zan khan YMA Sub Hqrs.Serchhip Executive members, Joint VC leh New Serchhip huamchhung Branch YMA 4-ten joint meeting neiin, tuitla zawn chhunzawm dan tur an ngaihtuah a, an rel angin nimin khan New Serchhip North Branch leh New Serchhip Bazar Branch ten Pu Lawmhlira leilet RV-a hmangin leh New Serchhip Venglai Branch, IOC Branch leh P&E Veng Branch YMA-ten Vanchengte kai RV-a hmangin tuitla an zawng bawk a, ruang hmuh a la nih loh avangin Ser-chhip-a YMA Branch hrang hrangte a intahtawla ruang zawng turin Sub-Hqrs. YMA hruaituten ruahmanna an siam dawn a ni.

Ruang zawngtute hman tur hian Bialtu MLA Pu Lal Thanhawla’n Rs.5,000 a rawn pek bakah Tuikum bialtu MLA Er. Lalrinawma’n, Rs.2,000/- a pe a, Serchhip District Bawrhsap chuan tui tla zawngtute hman atan hian Silpouline, Hruizen leh Motor te pe nghalin Thing-pui lum na tur Rs.2,000 a pe a, Serchhip SP-in Rs.1,000/- leh PHE Department EE-in Rs.2,000/- an pek bakah mi inphal-ten pawisa fai bakah chawhhmeh leh thil dang an thehkhawm bawk a, ruang zawnnaah hian Serchhip-a sawrkar officer-ten a hmun hi an ṭhutchilh deuh reng a ni.

——————————————————–

Tuitla ruang zawn dan tur chu vawiin atan hetiang hian ruahmanna siam a ni –
Serchhip Kawnpui South Branch leh Vengchung Branch YMA-ten Pu Lawmhlira Leilet RV-ah an hmang ang a, Vanchengkai lama duty turin Serchhip Hmar Veng Branch YMA leh Serchhip Chanmari Branch YMA te an ni.