Champion lai Chelsea chuan Premier League-a an match hnihnaah hnehna changin Tottenham lakah 2-1-in an chak a, Marcos Alonso chuan Chelsea tan goal hnih thunin, Chelsea Bench aṭanga lut Mitchi Batshuayi chuan an lamah Tottenham tan a ti-goal palh hlauh bawk.
Tottenham hian an Stadium an sak ṭhat avangin home atan Wembley Stadium an hmang a, Chelsea an hnehlohna match hi Wembley an hman hnua Home game an khelh hmasakna ber a ni.
Inkhelh tir lamah Chelsea chuan game an thunun a, Chelsea boss Antonio Conte chuan Spurs midfielders an ṭha tih a hre chiang a, chuvang chuan Spurs midfield dang chat turin a team a rem a, heta ṭang hian game ṭang lo chho deuh a, Spurs chuan na takin nawr mahse a pawimawh ber goal an thun thei lova, Chelsea keeper Thibaut Courtois chuan hna a nei zauh zauh a, Harry Kane chuan Chelsea goal ban a pet per dawp nghe nghe. Hetihlai hian a bet zawka ṭang Chelsea chuan goal an thun hmasa a, minute 24-ah David Luiz free kick hlawhchhuah chu Alonso chuan mawi lutukin 25 yards aṭangin top corner-ah a thlawh lut, First half-ah hian Chelsea hian shot on target vawi khat chiah an nei a, chu chu a goal a ni.
Spurs-in an siphurh rulh tumin na takin an nawr, goal pawh an khung teuh thin hle, mahse Chelsea an inrem phui em a, Minute 79-ah Conte chuan Morata lachhuakin Batshuayi a dah lût, rei a khelh hmain Batshuayi chuan an lamah a tauh goal nghal. Minute 82-ah Mual veilam sir atanga Eriksen free kick tha zet chu near post-ah Batshuayi chuan a lo tauh goal a ni.
Chelsea hian point 3 hlawhchhuah an tum ruh hle, an nawr lehnghal zat a, minute 88-ah Dembele ball hloh chu Chelsea chuan ṭangkaiah hmangin Pedro ball pek ṭha zet chu box veilam sir aṭangin Alonso chuan a pet goal. Lloris khan a kein lo dang selang chuan a save ni mai tur a ni a, tlu paha man a tum a, goal ho takin a chhuah ta a ni.
Willian pawhin Spurs goal ban a pet per bawk a, inkhelh pumpui thlirin Spurs an khel tha zawk a, Conte-a game plan erawhin hna a thawk fuh zawk kan ti thei awm e. Spurs hian ball possession 68% an nei a, shots vawi 18 an neih laiin Chelsea chuan vawi 9 an nei. Shots on target vawi 6 Spurs in an neih laiin Chelsea hian Shot on target vawi 2 chiah an nei a, a goal ve ve a ni.