CBI ko lût turin MNF te ngen nawn a ngai lo:CM

MNF-in an lehkha thehluh ngaihvenin CM Office-ah an kal
Mizo Carbon Products leh State Lottery chhui tura CBI ko lût turin MNF-te’n an ngen nawn a ngailo a, a theih ang tawk tawkin hma a lo la tawh zawk niin Chief Minister Pu Lal Thanhawla chuan a sawi.

Rorellai party, MPCC-in thuchhuah an siamah Mizo Carbon leh Lottery chhui chung-changa CBI ko lut tura MNF party worker ṭhenkhat ten nimin, September ni 4, 2017 chawhma lama Chief Minister hmuh an tum laiin, Chief Minister chuan MNF ten August ni 10, 2017-a a hnena lehkha an thawn, Mizo Carbon leh Lottery chung-chang chiang zawka hriat theih nana CBI chhuitir tura an ngenna thehluh chu September ni 1, 2017 khan MNF Gen. Secretary pakhat hnenah ziakin alo chhâng daih tawh zawk niin a sawi a, a lo bawhzui daih tawh thil a nih avangin CM hian amah inhmuhtir lovin MNF General Secretary hnena a lehkhathawn copy hi a lo pe zawk a, MPCC chuan, “Hetianga CBI kohluh phur leh cho taka eptu party-te lehkha bawhzui duh mi Chief Minister kan nei hi MPCC chuan a chhuang hle a ni,” an ti.

Chief Minister chuan CBI chhuitir chu an phur tih a sawi a, thil chhui tir an nih dawn rau rau chuan kum 1999 aṭangin chhui law law a ṭula an hriat thu leh a remchang hmasa berah kan chhuitir ngei dawn tih a sawi a, Chief Minister chuan hetianga MNF-ten CBI koh luh leh thil dik lo ni a an hriat chhui tura an duh a nih chuan tunhnai thil mai ni lovin, MNF-in thuneihna an chanlai a mipui ten thudik ziktluak an hriat theih loh chi hrang hrang, Baffacos chungchang te, Aii Puk leh Ek In kal thei chung-chang te, OPD building bo te, Aizawl Water Supply Phase II te, Tuirial Compensation te, Police mawza manto te leh dispro-portonate assets leh a dang tam tak sawi mai sen loh te nen lama chhui nise a tih chu MPCC chuan ṭha an tih thu an sawi.

Hetihlai hian MNF Party chuan nimin khan thuchhuah siamin, Lottery chungchanga CBI ko lût tura an ngenna lehkha thehluh ngaihvenin nimin khan Chief Minister Office-ah an kal tih an sawi a, Lottery chungchang CBI chhuitir tura ko lut tur hian Chief Minister hnenah kumin July ni 11 khan lehkha an theh lût tawh a, Chief Minister hmalakna engmah hmuh tur a awm zui tak loh avangin Zirtawpni liam ta khan Chief Secretary hnenah kalin sawrkar hmalakna hi an ngaihven a, hetah hian Chief Secretary-in Chief Minister hnen aṭanga engmah hriattirna a la dawn loh thuin a lo chhâng a, hei avang hian Zirtawpni tlaiah Chief Minister hmu turin MNF-te chu an kal leh a, Chief Minister PS-in Chief Minister chu phone-in MNF-ten an hmuh duh thu a hrilh a, Chief Minister chuan a hmuh theih loh tur thu a lo hrilh avangin Lottery chungchanga Chief Minister hmalakna chin an hriat duh thu Chief Minister PS chu hrilhin an haw ta a.

Hmalakna engmah hriatzui a nih loh avangin nimin khan Dr. K. Beichhua MLA hovin ṭhalai mi 70 chuang Chief Minister Office-ah hian an kal leh a, hetah hian Chief Minister chuan ziakin, ‘Lottery chung-changah CBI ko lut turin Chief Secretary a hrilh vat’ thuin a lo chhang a. Zirtawpnia Chief Secretary an hmuhnaah Chief Minister aṭanga hriattirna a la dawn loh thu Chief Secretary-in a sawi leh Chief Minister-in CBI ko lut tura Chief Secretary a hrilh thu a sawi chu thu inkalh tlat a ni, MNF chuan an ti a. A khawi hi nge dik zawk tih sawifiah vat tura Chief Minister an phut thu leh Congress Bhavan-a inhrosa a, CBI ko lut tura insawi fo ringawt lova a tak ngeia hma la a, CBI ko lut vat turin an phût tih MNF chuan an sawi a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram