Chite lui tihthianghlim thar leh chhanchhuak tura hmalakna turin mipuiah vehbur khawn tum

Aizawl khawpui sira luang Chite Lui tihthianghlim thar leha chhanchhuak tura hmalakna chu sawrkar hmalakna ni mai lo va mipui hmalakna a nih lehzual theih nan mipuite hnenah tlem lua leh tam lua awm lo va vehbur khawn dan dap ni se, tiin Save Chite Lui Coordination Committee (SCLCC) chuan an rel.

SCLCC hi an Patron, Governor Lt. Gen. Nirbhay Sharma-a hoin Raj Bhavan-ah an ṭhukhawm a, Chief Minister Pu Lal Thanhawla pawh a tel a, ṭhutkhawmnaa telte hian Chite Lui ruama hmalakna hmel-hmang kumin chhunga a lan ngei theih nan chak zawka hmalak leh mipui nawlpui hmalakna huanga a sawn luh an rel a. Governor chuan, thil tha siam turin khua leh tuite’n an sum an theh chhuah phal a ngai thin tih sawiin, Chite lui tih thianghlim nan hian tlem lua awm lova sum thawh theuh turin mipui a ngen a, ani pawhin sum a thawh tur thu a sawi.

Chite Lui chhanchhuak tura hmalakna kalzel hi India ram pum tana entawn tur tling khawpa kalpui theih a nih thu leh chutiang taka tan la turin Governor chuan Mizo mipuite a sawm a. Chite Lui fai leh mawi buatsaih chu Mizo mipuiten Krismas thilpek atan puitlin tum ngei turin a chah a ni.

Chief Minister Pu Lal Thanhawla pawhin, an naupan laia Chite Lui a hriat thin, lui lian pangai tak, sangha lian deuh te pawh awmna leh lenkhang zar theih khawpa lian a lo danglam ta lutuk leh tawp ta lutuk chu pawi a tih thu a sawi a. A siamthat nan khua a la tlai lo tih sawiin, Chite lui a lo dam khawchhuah leh nan lui kama mimal ram neitute leh Chite lui fintu Lui tê zawk kama mimal, ram neituten rilru zau tak pu-a an ramah thing leh mau phun an phal a tul, a ti a. Chite lui hnar leh sir tawn tawna Aizawl Veng lian deuh deuha mipuite chu an bawlhlawh chinfel danah an fimkhur zual a tul, a ti a.

Chite Lui chhanchhuak turin mitinin mawhphurhna an neih vek thu sawiin Chief Minister chuan Chite Luiin a luan tlang MLA Constituency 8-a Bialtu MLA-te pawhin he hmalakna pawimawh tak atan hian an MLA Local Area Development Fund aṭanga sum thehchhuah an harsat a rinloh thu sawi a. Aizawl khawpui thang zelah khawchhunga luite ngaihven a tul tawh a, Chite Lui tlukin Tuikual Lui pawh a theih ang anga humhalh leh tihfai a hun tawh takzet a ni, a ti.

Krismas hma ngeia Mizo mipuite hnena Chite Lui fai leh thianghlim zawk pe tura hmalakna atana tun thla ni 29-ah leh November ni 24-ah Aizawl khawpui chhunga zirna in hrang hrang 24-a NSS Volunteer-ten ‘Chite Lui Tihfai Hnatlangpui’ nei se, tiin SCLCC chuan a rel a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram