Zothlifim Logo
Loading ...

Kum 30 hnua hmeichhe minister lakluh lehna hmasa ber ni turin nimin khan Hrangturzo bialtu MLA Pi Vanlalawmpuii Chawngthu chu Minister of State atan rinawmna thu tiamtira lakluh a ni.

Lakluh inkhawm hi Raj Bhavan Durbar Hall-ah Chief Secretary Lalmalsawma kaih-hruaiin neih a ni a, Governor Lt Gen Nirbhar Sharma chuan rinawmna thu tiamtirn a lalut a, he inkhawmah hian Chief Minister Pu Lal Thanhawla, Minister te, MLA leh sawrkar official eng emawzat an tel a ni.

MPCC President leh Chief Minister ni bawk Lal Than-hawla’n a bial pakhat zawk Hrangturzo a kalsan avangin kum 2014 khan Hrangturzo Assembly Bial ah By-Election neih a ni a, he inthlanah hian Pi Vanlalawmpuii Chawngthu hi thlan tlin a ni a. Mizoram Legislative Assembly 7-naa Hmeichhe MLA awmchhun a ni mek a ni.

Kum 37 mi Pi Vanlalawm-puii Chawngthu hi zirna lamah MA (Political Science) niin, Mizoram Pradesh Youth Congress Committee-a nihna hrang hrang te lo chelh tawhin tunah hian MPYCC President leh Mizoram Women Commission Chairman ni lai mek a ni.
Mizorama hmeichhe MLA hmasa ber chu Pi Saptawni a ni a, chumi hnu deuhah Pi Than-mawii chu kum 1978-ah PC ticket-in Serchhip bialah thlan tlin a ni a, kum 1987 MNF Ministry-ah Pi Lalhlimpuii chu MLA a thlantlin a nih mai bakah Minister dinhmun chelhin, Pi Lalhlimpuii hi Mizo hmeichhia te zinga Minister ni hmasa ber a ni a. Hemi hnu hian hun rei tak Mizoram Assembly-a roreltute zingah hmeichhia an awm lo a, Mizoramin hmeichhe Minister a neih pahnihna ni turin nimin tlai khan Minister of State ah lakluh ani ta a ni.

Nimin tlai a Minister of State atana lak luh Vanlal-awmpuii Chawngthu nen hian Mizoram sawrkarah cabinet minister pariat leh minister of state 3 an awm dawn a ni.

Pi Vanlalawmpuii chuan a hna chanpual te pek a nih hunah theihtawp chhhuah a thawh atum tih sawiin. CM chungah hmeichhia zawng zawng ten lawmthu sawitur nia ahriat thu sawiin, hmeichhia zawng zawng te aiawh a awm a nih angin nasa zawka thawh a tum thu a sawi bawk.