Mizoram sawrkar leh Hmar People’s Convention (Democratic) (HPCD) te remna zawnga inbiakna ni 2 awh chu nimin khan tluang taka zawhfel a ni.
Inbiakna hi Aizawl-a State Guest House ah neih chhunzawm a ni a, Mizoram sawrkar aiawha tel Home Department Addl. Secretary Pu Lalbiakzama chuan inremna siam tura tih tur hrang hrang te an duang a, Sinlung Hill Council din tur hnathawh dan tur leh thuneihna a neih chin tur te sawiho a ni bawk a ni.
Inbiaknaah hian HPCD te’n sawrkar hnena an ralthuam an hlan dan turte leh hel 60 te tuamhlawm dan tur te sawiho a ni bawk a ni.
Tun ṭum inbiakna hi thla 5 an chawlhsan hnua an inbiak lehna hmasa ber a ni a, HPC (D) lam aiawh mi paruk an tel a, an pawl working President Pu LT Hmar-in a ho a ni.
Home Department Additional Secretary Pu Lalbiak-zama chuan inbiakna boruak a ṭha a, sawiho tura an ruatsa thil hrang hrang sawiho a nih thu a sawi a, tun ṭum inbiakna hi nikum August ni 10 atanga tan a ni a, inbiaklehna chu political level-a neih tum a ni tawh ang.
Inbiakna hi neih lawk loh a nih chhan chu, Lahming-thanga Sanate kaihhruai HPCD phel lehlam pawh inrempui tumin sorkar chuan a biaa, amaherawhchu an pawlin Autonomous Dist Council pe tura rawtna a neih chu sorkarin pawm chiaa ngaih loh avangin inbiakna hi tihtawp zui a ni ta a ni.