Mahni Thlaithar Zuartute tan ZNP President-in theihtawp chhuah inhuam

ZNP President Pu Lalduhoma chuan Mahni Thlaithar Zuartute harsatna chingfel tura theihtawp chhuah a huam thu a sawi.

ZNP thuchhuahin a tarlan danin Mahni Thlai Thar Zuartute hian nimin khan Pu Lalduhoma hi ZNP Office-ah hmu-in an harsatna hrang hrangte an hrilh a, an thlai thar hralhna tur dawhkan an neih ve loh chungchang te, an thlai thar zawrh hun bituksak – zing dar 9 thleng chu hun a tlêm lutuk avangin an thlai thar an hralh zawh hman loh thute, an thlai zawrhte khuhtu hulhliap an neihloh avanga an harsatna te leh zan lama êng ṭha an neih loh avanga an harsatna tawhte Pu Lalduhoma hi an hrilh a. Pu Lalduhoma chuan Mahni Thlai Thar Zuar Pawl hruaitute chu a ngaih pawimawh thu leh theihtawp chhuaha puih a inhuam thu a lo hrilh a ni.

ZNP thuchhuah chuan, Assembly House-ah pawh Pu Lalduhoma chu 2004 kum khan mahni thlai thar zuartute tan a lo au chhuak tawh a, hemi bawhzui na’n hian MNF sawrkar khan Millenium Centre kawtah thlai thar zawrhna tur dawhkan a siamsak a, mahse hun reilote hnuah Police te hmanga ûmchhuah leh an ni a, an thlai tharte pawh laksakin an dawhkante pawh chhutchhiatsak an ni, a ti a. Thlaithar zuartute chu Reiek kai Tlawng kamah motor a phurh thlaka hnutchhiah hial an lo tawk tawh a, heta ṭanga vawiin thlengin mahni thlai thar zuar-tute hian sawrkar ngaihsak tak takna an dawng lo chu pawi an tih thu ZNP chuan an thu-chhuahah chuan an tarlang a ni.

ZNP chuan Mahni Thlai Thar Zuartu ten harsatna an tawh chu uluk takin sorkarin enpui se, tuna an thlaithar zawrh theih hun chhung zing dar 9 thleng chu pawhsei sakin dar 12 thlenga an inzawrh phalsak turin sorkar an ngenpui tih an thuchhuahah chuan an sawi a; Eng mumal lo hnuaia an inzawrh tawh loh na’n sorkarin eng mumal tak pe ngei thei se an duh tih an sawi bawk.

Mahni Thlai Thar Zuar Association Member te hi khaw hrang hrang 35 atanga kalkhawm an ni a, tunah hian Mizoram pumah Member sang chuang an awm mek tih ZNP chuan an thuchhuahah chuan a tarlang bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram