Sawrkar laipui chuan kum 2020 ah khaw thlan chhuah bik 50000 te chu mi rethei awm tawh lohna a puang turin hma ala mek a, hemi atan hian Mizo-ram a khaw 183 thlan tel a ni.
Rural Development Minister R. Lalzirliana chuan Chief Secretary’s Conference Hall a thuthar thehdarhtute a kawm na ah he thu hi sawiin, India ram atanga retheihna umbo tumna program hlawm lian chu Mission Antyodaya tih a nih thu a sawi a, tun a khaw thlan chhuah bak khawdang te chu kum 2022 ah rethei awm tawh lohna a puan leh a nih tur thu a sawi bawk.
Minister chuan hmalakna atan hian Oct. ni 1 atanga ni 15 inkar chhunga Mizoram pum a hun hman dan tur duanfel tawh chu sawilangin, kar hnih chhung hian khaw thlan bik 183 te tan Baseline Survey neih tur a ni a, hemi rual hian heng khaw thlan bikte atanga BPL awm tawh lohna tur atana hma lakna turin Gram Panchayat Development Plan (GPDP) siam nghal tur a nih thu a sawi.
Survey neih hnu hian hmala tha leh hemi hnuaia ti tha khua te chu lawmman siam sak an nih dawn thu Minister chuan a sawi a, hemi atan hian tehfung hrang hrang zingah – Faina lam te, GPDP siam that dan te leh Vantlang inkhawm an kohkhawm dan te a tel tur thu a sawi bawk.