Govt. Serchhip College-in lawmman an dawng
Nimin khan State pum huapin ‘Vaihlo tel lo infiamna’ tih thupuia hmangin ‘Vaihlo Do Ni’ hman a ni a, Serchhip DC Meeting Room-ah pawh Mizoram State Anti-Tobacco Day vawi 4 na hi hmangin sawm bik mi pawimawhten hun an hmang a, Day thupui Zuk leh Hmuam tello Infiamna (Tobacco Free Sports) tih thupui hmanga inzirtirna leh zuk leh hmuam laka fihlim tura intiamna te neih nghal a ni.
He hun Dr. Laldawngliana Sailo, CMO Serchhip kaih-hruaia khuallian, Pu Chuau-hnuna, Addl DC chuan, “Hmanah chuan kan thlahtu-ten zuk leh hmuam an uar ṭhinin an lo intihhmuh nasa ṭhin hle a ni mahna, tunah erawh chuan chung thilte chu taksa tana ṭha lo, min tichaklotu, nun titawitu, sum leh hun tam tak eiraltu a nihzia kan chiang tawh a, kan bansan a, kan fihlim a ṭul tawh a. Pathian thu nen pawh a inrema, sawrkar sum renchem-na pawimawh tak a tling bawk ang,” a ti.
He hunah hian Nl. K. Hmingthansangi, District Consultant, NTCP chuan Anti Tobacco Day 2017 thupui – ‘Tobacco Free Sports’ tih hmangin thu a sawi a, Mizote chu infiamna lama talent nei ṭha tak kan ni a, amaherawh chu zuk leh hmuam vang zawkin mi tam takin an thlen phak tur ang an thleng pha lo ṭhin a ni, a ti a, Vaihlo laka naupangte him theihna pawimawh ber chu tihhmuh loh a ni a, vaihlo tichhin za zela 25 vel hian a ngawl an vei zui ngei ṭhin a, kum 18 hnuai lama tichhin te phei chuan nghet takin a ngawl an vei duh bik niin a sawi.
He huna kalkhawmte hian Pu R.Vanrengpuia, SDO (Sadar) kaihhruaina hnuaiah zuk leh hmuam laka fihlim tura intiamna an nei a ni.
Aizawla he ni hmanna, Lal Thanhawla Auditorium-a neih hi Chief Minister Pu Lal Thanhawla hova hman niin zirlaite leh Sports Association hrang hrang hruaituten an hmang a, Mizoram Smokefree Group Chairman, Chief Minister Pu Lal Thanhawla’n thu sawiin, Sports Association hrang hrang hruaitute zinga a tam zawk, zûk leh hmuam, a bikin vaihlo leh kuhva khawr kaihhnawiha fihlim lo an ni a, Mizoram Olympic Association (MOA) President leh Indian Olympic Association-a Ex-Officio Vice Chairman a nihna angin Mizoram Sports Administrator zawng zawngte chu zûk leh hmuam, a bikin kuhva khawr ei leh meizukah fihlim turin a ngen a, khawvel changkang zela infiamna hmasawn zelin mi a kaihhruaina leh a duhdan angin administrator zingah zûk leh hmuama fihlim lo an awmlohna tura hmalak zel dan tur pawh ngaihtuah a la ni ang, a ti.
Chief Minister hian zûk leh hmuam dona kawnga an awmna huang bika hma la ṭha te hnenah lawmman a sem nghal a, New Life Hospital, Zarkawt; Millenium English School, Zemabawk; Govt. Serchhip College; District Hospital, Kolasib leh Mizoram Amateur Taekwondo Association ten lawmman an dawng a ni.
4th Mizoram State Anti-Tobacco Day -2017 prog-ramme-ah hian Indian Society on Tobacco & Health, Mizoram Chapter President leh Vice President te, National Tobacco Control Programme State Nodal Officer te’n thu an sawi a, Mizoram State Sports Council Secretary-in vaihlo leh a kaihhnawih laka fihlim tura intiamna leh zuk leh hmuam do kawnga thawk tura intiamna hun a kaihruai a ni.