PRISM President Pu Vanlalruata chuan Chief Minister Pu Lal Thanhawla’n PRISM-in amah pawisa an dil nia a sawi chungchang chu chhangin, “PRISM hian Lal Thanhawla hi pawisa kan la dil lo,” a ti.
He thu hi nimina PRISM-in bengvar inkhawm an neihah sawiin, Pu Valalruata chuan, “Hman deuh khan PRISM-in camera leina kan dil niawm takin dawt nuihzatthlak tak a lo sawi tawh bawk a. Camera kan dil hun nia a sawi chu kan pawl PRISM din kum, kum 2006 aṭanga chhiar leta kum 8 kal tawh, kum 1998 a ni a. Eptu an nih laia pawisa kan dil nia a sawi pawh hi a hun han phuahchawp leh nghal chu nise kan pawl din hma a ni leh hial mai thei a ni,” a ti a, Sawrkar hnathawkte pawisa dil a, eiru a puh ṭhin chungchanga CM puhna pawh chhangin PRISM chu eiru-a midang puh a chhui theitu an ni lova, eiru nia rinhleh chhui theitu chu Anti-Corruption Bureau (ACB) te an ni, a ti bawk.
Pu Vanlalruata chuan Chief Minister-in dawt sawi a hmang ta nia a lang chu pawi a tih thu leh pa pui tak, mi ngaihdan lo zawng deuh pawh dik nia a hriat chu sawi mai ngam nia an ngaih thinin thudiklo sawi a ching ta tlat chu a zia lo hle a ni tiin, hetianga Chief Minister berin dawt a sawi ta fo mai hi pawi a tih thu leh dawt leh thu dik, sawi tur leh tur lo pawh thliar hrang thei tawh lo khawpin a kum a tam ta nia a ngaih thu a sawi a, a dawt sawi tichiang thei thlalak a darh fo te chuan ngaihtuah a tithui hle a, hetiang a nih avang hian vên ngai tak a nih ve tawhzia a lang niin a sawi.
Hei bakah hian tun hnaia media-a lo lang, Chief Minister-in tunlaia lar tak Citizenship Amendment Bill hmanga khua leh tuia pawm tur zingah Kristian leh Mosolman an tel lo a ti chu a dik lo tih sawiin, he Bill-in khua leh tuia pawm tur a tih te chu Hindu, Sikh, Buddhist, Jain, Parsi leh Kristian te a ni a, dawt a sawi mai baka hriatthiam har chu a hun laia hma la duh hlek si lovin he Bill hlauhawm leh dodal a ṭul thu a sawi leh si te hi a ni, a ti bawk.
Danpui kalha Parliamentary Secretary enkawl nana diklo taka mipui sum (public Money) cheng vaibelchhe 18.81 a rulh loh tur thu a sawi chu PRISM chuan mak an tih thu sawiin, kum 2010-a ama ho ngeia Dan an siam Mizoram Public Servant Personal Liability Act, 2010-ah khan hetianga diklo taka mipui sum khawhral a awm chuan a mawhphurtuin a rul tur tih a ni a, ama ho ngeia Dan siam pawh a zawm dawn lo a nih chuan luipui anga luantir an tum rorelna dik chu a khuap ding leh dawn tihna a ni, a ti bawk.