Mizoram PWD chuan Rengtekawn leh Bairabi inkar kawngpui chhe lutuk nia sawi chu pawi an tih thu sawiin hetiang taka a chhiat chhan hi nimin khan an sawi fiah.
Sawrkar thuchhuahin a sawi dan chuan Rengtekawn leh Bairabi inkar kawngpui siamtha tura Mizoram Truck Owners Association (MTOA) leh Mizoram Trucks Drivers Association (MTDA) ngenna chungchangah PWD hian thuchhuah an siam a. An sawi dan chuan he kawng hi kumin March thla atanga tun thlenga ruah sur a tam avangin nasa takin a chhia a, motor tana kal harsa khawp alo ni hi MPWD chuan pawi a ti takzet a. He kawng hi siamthat ngai a ni tih hria in Sorkar-ah estimate pawh siam a thehluh a ni a. Rengtekawn leh Zero Point inkar hi NEDP sum hmanga siam that turin estimate theh lut in sanction nghah mek a ni. Meidum leh Zero Point inkar siamthatna turin Sorkar Laipuia Highway Ministry in sanction a pe tawh a, mahse vawiin thlengin Ministry lam atanga tender tihfel a la nih loh avangin hna tan theih a ni lova. Bairabi leh Meidum inkara Sunshine Overseas hnathawh hi a zawh hma a fur in a nan’ tak avangin thawh tawh pawh nasa takin a chhe leh a; Sunshine Overseas hian anmahni senso a siamthat leh turin hma a la mek a. He hna atan a sum sen tura ruahman hi ennawna tihpun a ni lova, tihpun tumna pawh a awm bawk hek lo, an ti.
Rin loh takin kum dang zawng aia fur a rei avangin Rengtekawn leh Bairabi kar kawng hi kumin July thla vel atang khan nasa takin a lo chhe zual ta a. PWD Kolasib Division chuan theihtawp chhuah a siamthat hna thawkin Chief Engineer leh Superintending Engineer pawhin a hmunah tlawhin siamthat dan tur an relpui a. Mahse vanduaithlak takin quarry kawng a chhiat avanga quarry atanga lung phurh chhuah hleih theih a nih loh avangin mamawh ang hmanrua hmuh theih a ni lova. Silchar atang leh hmuh theihna ang ang atanga lung dap in theihtawp chhuah a siamthat hna thawh zel a ni. Tunah chuan Rengtekawn atanga Zero Point chu a zia-awm deuh tawh a. Harsatna dang a awmloh a, lung hmuh theih a nih chuan Zero Point atanga Bairabi pawh ni hnih/thum chhung chuan harsa vak lova truck kal theih tura siam theih beisei a ni an ti a. Hetiang dinhmun harsa taka an awm avang hian MTOA leh MTDA te pawhin lo hrethiam a, mipuiin harsatna kan tawh loh nan Bairabi atanga buhfai phur chhunzawm zel turin PWD chuan an ngen a ni, tiin sorkar thuchhuah chuan a tarlang.
Hetihlai hian MTOA leh MTDA inhmuhkhawm te chuan kawng siamthat phutin ni thum chhung an lirthei din tir an tum thu an sawi.
Pawl pahnih te chuan hun engemaw chen kawng siamtha tura sorkar an ngaih chan hnu ah siamthat a nih tak loh avangin, hnathawk tute’n thawl zawka kawng an siamthat theih na’n kar leh Tawhtanni atang Nilaini thleng hian Mizoram pumah bungraw phur truck zawng zawng te an tlan dawn lo tih an sawi a. Hei hian State dang truck pawh a huam dawn a, Mizoram a rawn tlan lut bungraw phur truck te pawh dan vek tum a ni tih pawl pahnih inhmukhawm te hian sawiin Truck ruak haw lam erawh an hmalakna hian a huam ve dawn loh thu thuchhuah siamin an tarlang a ni.
MTOA hian August ni 18 khan Sairang leh Khamrang inkar kawng Silchar leh Aizawl inkar kawngpui chhe zual pui thawm that na’n lung truck lian trip 5 leiin hnatlangin kawng siamthat hna hi an lo thawk tawh a. August ni 3 pawh khan Kolasib leh Rengte inkar kawngpui Bairabi kawng chhe zualpui lai chu cheng nuai 3 sengin an lo siam tawh bawk. FCSA carrying contractor te hnuaia buhfai an phur mek chu Mizoram hmun hrang hrang kawng chhe nasa vanga motor chhiatna leh a phurh man a inman loh thu tarlangin MTOA leh MTDA chuan sorkarin tender thar a chhuah a phurh man sang zawka an phur thei a nih loh chuan September ni 1 atanga Buhfai phurh an tum tawh loh thu an lo sawi tawh bawk a ni. MTOA leh MTDA hruaitute hnen atanga thudawn danin kar leh lirthei tlan loh an tum hun ah hian zing dar 5 atanga tlai dar 5 thleng a nih tur thu an sawi a ni.