Thingtlanga kuthnathawktute tih hmasawnna tur ruahmanna zirchiang

Nimin khan Chief Minister’s Cabinet Room-ah Chief Minister Pu Lal Thanhawla hovin sawrkar mipawi-mawh te chuan NEDP hnuaia thingtlang khua a kuthna-thawktu te tih hmasawnna tur, United Nations Development Programme (UNDP)-in a duan zirchianna an nei.

He meeting-ah hian thing-tlang khaw kuthnathawktu ten anmahni eitur leh tualchhunga an hralh aia tam buh leh bal an tharchhuah te, sum leh paia awlsam zawka an chantir theih-na tura UNDP-in ruahmanna a buatsaih chungchang leh kal-pui a nih theih dan te sawiho a ni.

Meeting kaihruaitu Chief Minister Pu Lal Thanhawla chuan kharchhawngtute leh ‘Middle men’ te lak aṭanga kuthnathawktute chhan-chhuah chu thil hmanhmawh thlak a nih thu a sawi a, kuthna-thawktu ten leirem an rah hun leh eizawnna ngelnghet an neih hma chu ramin hmasawn-na kawng a zawh tak tak thei lova, Kuthnathawktute thawh-chhuah tihpun leh an thar chhuah lo leitu sumdawng te paw’n tam an tih zât, hralh tura lâkkhawmsak a nih theih nan concerned department te an ṭan mar pat a ngai tih a sawi a, bial khat chhunga kuthna-thawktute leh concerned department te pawhin inthlun-zawmna ṭha tak an neih a ṭul a ni a ti a, Mizoram a thlai thar te chu hriselna atana ṭha, organic products vek an ni a, Mizoram-in a châwkluh te chu hriselna atana him lo, damdawi hmang a enkawl a ni tih te chu mipuiin an hriat a ngaih thu sawiin, Mizoramin a thar chhuah te ngaih-hlut nachang hriat a ngai a ti.

Thusawitu dang Planning Minister Pu Lalsawta chuan kuthnathawktu ten eizawnna ngelnghet an neih a, an thlai thar te man man zawka an hralh sawrkarin a tum thu a sawi a, chutihlai chuan kuthnahnawk-tute thlai thar te awmze neia suma lo chan tir turin entrepreneur te tan erawh hmun a awm thu leh Mizorama thlai thar te chu a man tur dik tak, a leitu mipui te tana sum hlohna emaw hekna tur awmlo, a tu te tan pawha hlâwk ve ve tura kalpui thiam a pawimawh hle a ni a ti a, Inrinni ringawt a, thlai thar bazarpui hawn hisap lovin kartluana thlai thar lam zawrh chhuah a nih theih nan dawrkai te pawn Air Conditioned Vegetable Stall te hawn tinzawn a hun tawh a ti.

UNDP-in Village Level Development Programme (VLDP) a duan atan a senso zat tur chu cheng vaibelchhe 5.1 a ni a, Concerned Department te leh UNDP thawhhona-in a duan lawk ang thlapa VLDP sum hi hman tura duan a ni a, VLDP-ah hian convergence uar a nih tur thu te, concerned department te chu inthlunzawm vek tur leh an hmalakna te inhriatpui vek tur a nih thu tarlan a ni a, VLDP hmalakna hnuaia thingtlang khua te chu a bial ang zawnga tuam niin, Farm Producers Organizations (FPO) te ṭangkai tak hman tum an ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram