Zothlifim Logo
Loading ...

Maria Sharapova-i’n thla 19 hnua Grand Slam Tournament a khelh hmasak ber chu Anastasija Sevastova chuan US Open Fourth Round-ah a tihtawpsak ta.

Latvia nula, 16th seed Sevastova hian Sharapova hi 5-7, 6-4, 6-2-a hnehin Quarterfinal a inhlangkai a, kum 27 mi, Sevastova hian Sloane Stephens chu Quarterfinal-ah a hmachhawn dawn a, Stephens hian Julia Georges hnehin Quarterfinal hi a thleng a ni.

Hetihlai hian Venus Williams chuan World number 35 Carla Suarez Navarro chu 6-3, 3-6, 6-1-a hnehin Quarterfinal a thleng a, kum 37 mi, American ninth seed Williams hian Quarterfinal-ah hian Petra Kvitova a hmachhawn dawn a, Czech 13th seed Kvitova hian Fourth Round-ah hian World No. 1 dinhmun beisei phaka ding Garbine Muguruza chu 7-6 (7-3), 6-3-in a hneh a, hei vang hian World No. 1 beisei thei an tlem zel a, tunah chuan world no. 1 ni lai Karolina Pliskova bakah fourth seed Elina Svitolina te chu No. 1 dinhmun beisei phaka ding an ni ta a, Svitolina hian number one ni tur chuan Semi-final tal thlen a mamawh a ni.

Mipa lamah Third Seed Roger Federer pawhin Fourth Round a thleng a, Straight set 6-3, 6-3, 7-5-in Feliciano Lopez a hneh a, kum 36 mi, Federer hian Fourth Round-ah Philipp Kohlschreiber a hmachhawn dawn a, Federer leh Rafael Nadal te hian Quarterfinal an paltlang thei a nih chuan Semi-Final-ah an inhmachhawn dawn a ni.

World number 19 Pablo Carreno Busta chuan Qualifier che ṭha tak Denis Shapovalov hnehin a vawi khatna atan US Open quarterfinal a thleng a, Carreno Busta hian inkhel hmuhnawm takah Canadian kum 18 mi, Shapovalov hi 7-6 (7-2), 7-6 (7-4), 7-6 (7-3)-in a hneh a, Carreno Busta hian Diego Schwartzman chu a hmachhawn leh dawn a, tun ṭum hi Grand Slam quarterfinal a thlen vawi hnihna niin, June thla khan French open Quarterfinal a lo thleng tawh a ni.