US Open: Semi-Final-ah Nadal; Federer erawh a tla

Top seed Rafael Nadal chuan Russian teenager Andrey Rublev hnehin US Open Semi-final a thleng ta.

Kum 31-a upa, Nadal hian darkar khat leh minute 37 chhungin kum 19 mi, Rublev hi 6-1, 6-2, 6-2-in a hneh a, hei hi kum 1990 US Open semi-final-a kum 19 mi Pete Sampras-a’n kum 31 mi, John McEnroe a hneh hnua Grand Slam semi-final-a kum 30 chung lam leh teenager te inkhelh lehna hmasa ber a ni.

Hetihlai hian Roger Federer erawh Juan Martin del Potro hneh lovin US Open aṭangin a tla a, 24th seed Del Potro hian semi-final thleng turin Federer hi 7-5, 3-6, 7-6 (10-8), 6-4-in a hneh a, Semi-Final-ah Nadal a hmachhawn a ngai dawn a ni.

Federer a chak loh takah chuan Nadal chu kar leh lamah pawh World Number One a la ni chhunzawm zel dawn a ni.

Hmeichhe lamah Madison Keys leh Coco Vandeweghe ten semi-final an thleng a, kumin US Open Semi-Final chu American hlangin an khel dawn ta a ni.

Vandeweghe chuan Top seed Karolina Pliskova chu 7-6 (7-4), 6-3-a hnehin Pliskova-i World No. 1 a nihna chu a tihtawpsak dawn ta a, kum 25 mi, Vandeweghe hian Semi-Final-ah hian Keys a hmachhawn dawn a, 15th Seed Keys hian 6-3, 6-3-in Kaia Kanepi lakah hnehna a chang a ni.

Pliskova hian World No. 1 a nihna humhim tur chuan US Open final hi a thlen ngei ngei a ngai a, final a thlen zawh tak loah chuan karleh aṭangin Spanish Garbine Muguruza chu No. 1 a ni dawn ta a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram