Zirtirtu 71-in ram pum huap zirtirtu ṭha chawimawina dawng tawh

School Education Minister, Pu H.Rohluna chuan kum 2016 thleng khan Mizoram aṭangin zirtirtu 71 ten rampum huapa zirtirtu ṭha chawimawina an dawng tawh tih a sawi.

Nimina Teachers’ Day puala a thuchahah a sawiah Pu H.Rohluna chuan ziak leh chhiar min thiamtir a, finna leh thiamna tam tak min pe a, ram leh hnam hmasawnna leh changkanna kawng min zawhtirtu leh mi puitlinga min chhertu zirtirtute hlutna hre thar turin mipuite a sâwm a, zirtirtute pawh ram hmasawnna hnathawktu pawimawh tak an ni tih hre chunga tun ai nasa a tan la sauh sauh turin a sawm bawk. Minister chuan zirtirtu fel tak tak an awm laiin, zirtirtu beisei phak lo pawh an awm a, department pawhin a tuar phah hle a ni ati a, zirtirtu thunun ngaite chu sawrkarin a thunun ṭhin a ni a ti bawk.

Minister chuan RTE Act-in a phût angin kum 2019 April ni 1 aṭang chuan sawrkar leh private school zawng zawngah danin a phût ang thiamna neilo chu zirtirtu hna thawh phal a ni dawn lo tih a sawi a, hetihlai hian zirtirtute harsatna hrethiamin, Ministry of Human Resource Development chuan zirtirtu thawk lai, training la nei lo zawng zawng ten danin a phut anga training an neih theih nan ruahmanna ṭha tak siamin, Training la nei lote chuan National Institute of Open Schooling hnuaia D.El.Ed (ODL) course training turin September ni 15, 2017 ral hma ngeiin internet aṭangin online-a in-register tur a ni a. Mizoramah chuan a ṭul anga buaipui turin State Coordinator atan SCERT ruat a ni a, hrechiang duh tan zawh fiah theih reng an ni a ti bawk.

Nimin Teachers’ Day kha ramchhung hmun dang rualin Mizoramah pawh zirna in hrang hrangah lawm a ni a, Serchhip khawpui chunga Zirna In tam berah Zirtirtute Ni hi Zirlaite’n an Zirtirtute chawimawina hun atan an hmang a, mahni School ṭheuhah inkhawm buatsaihin, Zirtirtute hnenah thilpek hlânin intihhlimna hun te an hmang a, Dr S.Radhakrishnan chanchin te ngaihthlak a ni bawk.

School Education Minister Pu H. Rohluna chuan nimin khan Mizo Zirlai Pawl, Reiek Sub Headquarters buatsaih Reiek Community Hall-ah ‘Zirtirtute Ni’ a hmanpui a ni.

Teachers’ Day hi India Vice President hmasa ber leh President pahnihna ni bawk, Dr. Sarvepalli Radhakrishnan pianchampha puala hman thin a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram