Felfai zawka CADC-in hna a thawh theihna turin ruahmanna hrang hrang siam

Larsap aiawha Chakma Autonomous District Council (CADC) sawrkar enkawltu ni mek, Lawngtlai district Bawrh-sap Dr Arun T chuan fel fai zawka CADC-in hna a thawh theihna turin ruahmanna hrang hrang a siam.

Bawrhsap thuchhuak ang chuan, CADC hnuaia zirtirtu atana lak, sikula zirtir hna thawk lova office hrang hranga officer, Assistant, UDC, LDC, etc. anga chhawr an awm tih hriat a nih thu tarlangin, hei hi ‘Right to Education’ dan kalh a nih avangin chutiang zirtirtute chu an thawhna department aṭangin sikul hrang hrangah October ni 15, 2017 hma-in an zawm vek tur a ni a, an thawhna department hotute pawhin a rang thei ang bera chhuahtir tur leh chutiang zirtirtute chuan an hna zawm nghal thuai tura hriattir an ni a, CADC Executive Secretary chu he thil hi lo bawhzui a, October ni 18 hma ngeia Caretaker /Lawngtlai Bawrhsap hnena hmalâkna report thehlût tura tih a ni.

CADC hnuaia sikul hrang hrang dinhmun endika zirchiang turin member pathum – District Council PHE Assistant Engineer, District Council Soil Conservation Officer leh District Council Sericulture Extension Officer te telna Committee din a ni a, he committee hian CADC hnuaia Primary leh Middle sikul hrang hrang building infrastructure te, zunram thiarna leh tui dinhmun te, zirtirtu leh thawktu dang dinhmun te, chawchhun sem dan te, RSBY leh programme dang dang kalpui dan leh sikul mamawh hrang hrang zirchiangin, kumin November ni 30 hma-in Caretaker hnenah report a theh lut leh dawn a ni.

CADC Caretaker chuan CADC hnuaia hmasawnna hna hrang hrangte mipuiin an hriat theih nan CADC website tihchantlunna tur thuchhuah a siam bawk a, CADC hnuaia department hrang hrangte chuan thawktu awm dan leh an hlawh te, department hnuaia scheme hrang hrang leh hna thawh mek chungchang – contractor, project cost, thawhna hmun, hmasawn dan leh hriattirna leh thu chhuah pawimawh zawng zawng chu website enkawltu CADC IPRO hnenah thehlûtin, CADC website– www.cadc.gov.in-ah dah zel tawh tur a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram