Nimin khan Aizawl Civil Hospital Medical Superintendent Dr.KL Remsanga hovin Kayakalp External Assessors te leh Ministry of Health and Family Welfare, Govt.of India aiawh lo kal te bakah Civil Hospital-a Department tin Head of Department (HOD)-ten meeting pawimawh tak an nei.
Meeting-ah hian Ministry of H&FW aiawha lo kal Pu Mukesh Bajpai, Senior Architect leh Pu RK Upmanyu, Sr. Consultant te chuan an lo kal chhan sawiin Aizawl Civil Hospital-a hmasawnna hna hrang hrang tun hnaia thawh zawh tak leh thawh mekte a hmuna rawn en bakah hma lak zel dan tur duanpui an tum thu an sawi a, Head of Department-ten an department ṭheuha hna-thawhna tur bungrua (equipments) leh hmunhma thawm ṭhat ngai lai nia an hriatte Ministry of H&FW aiawhte hnenah hian an thlen a ni.
Nimin vek khan sawrkar damdawi in fai inelna Kayakalp atana Aizawl Civil Hospital endik hna chu thawh a ni bawk a, Kayakalp inelna hi thuah thuma kalpui niin, a hmasa berah mahni leh mahni inendik, internal assessment neih niin heta mark 70 hmu pha te hian District Hospital dang aṭanga endiktu, peer assessor te an hmachhawn leh a, Aizawl Civil Hospital hian endikna chhawng hnihah mark 70 chunglam an hmuh avangin nimin khan sawrkar laipui aiawha endiktu inspection team te an hmachhawn ta a ni.
Kayakalp Inspection team-ah hian National Health Mission Consultant Dr.Lal-chhuanawma leh Dr.Lalram-liana Dy.Director DHS(M) bakah Dr.Evelyn Lalremsangi leh Dr.Laldinpuii, Consultant, NHM te an tel a ni.
Hospital fai, nuam leh thianghlim, kalphung felfai taka zawm leh dan ang thlapa bawlhhlawh sawngbawl kawngah sawrkar hospital ten ṭan an lak lehzual theihna turin sawrkar laipui chuan Kayakalp award a siam a. District hospital tiṭha ber hnenah cheng nuai 50 leh pahnihna cheng nuai 20 pek ṭhin an ni. Aizawl Civil Hospital hian kum 2015 khan District Hospital fai ber lawmman a dawng tawh a ni.