Afghanistan-ah India-in point khat an hlawhchhuak

2022 World Cup leh 2023 Asian Cup khel tur zawnna, Dushanbe-a Ningani-a khelhah Afghanistan leh India-te chu 1-1-in an in-draw.

He inkhelah hian India hian bul an ṭan ṭha hle a, mahse a tawpah a hmawr an bawk ṭha thei lo. An inkhel rei telh telh a, a thlengtu Afghanistan lam an che ṭha chho ve telh telh a, set-pieces aṭangin goal an thun teuh thei hle a, first half tawp dawn hun pek belhah Afghanistan chuan goal an thun ta nge nge a, Zelfagar Nazary chuan mual neitu lam hi hma a hruaipui ta a ni.

Second half-ah India coach Ignor Stimac chuan khel ṭhalo tak, Mandar Rao Dessai chu Farukh Choudary-in a thlak a, first half aiin an khel ṭha chho ta a, chance pawh an nei nual a, a tawpah chuan India chuan an tum hlenin, goal an thun ta nge nge a, hun tawp dawn tak takah substitute bench aṭanga lût Seiminlen Doungel chuan India si phurh a sut a, 1-1-in an in-draw a, India chuan an mikhualnaah point khat an hlawhchhuak ta a ni.

Heti hian an group-ah match 4 ṭheuh khekin Qatar chuan point 10 neiin hma an hruai a, Oman-in point 9 neiin, Afghanistan-in point 4, India-in point 3 leh Bangladesh-ten point khat an nei a ni.

Tun thla ni 19 khian India hi Oman tlawhin an zin chhuak leh dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram