Zothlifim Logo
Loading ...

Sports Minister Robert Romawia Royte chuan Central Ministry hrang hrang a dawr kuala, Union Sports Minister Chairman na hnuaia All India Sports Ministers Conference ah a tel bawk.

Tourism Minister nibawk Romawia Royte kutah hian Ministry of DoNER hotute chuan Reiek Tourism Project Phase-I sanction-na Meeting Minute an lo hlan a, cheng nuai 560 pekchhuah tur a ni a, MDoNER Guidelines tharah a rawtna lo thehluh tawh angin Sports chu ngaihpawimawh zingah telh an tum thu an lo hrilh bawk.

Mizoram State Games 2019 atana sum cheng nuai 250 chauh Mizoramin a neih avangin cheng nuai 150 dang rawtna pawh Pu Roberta hian Union Secretary, Ministry of Tribal Affairs ah thehlutin Union Secretary chuan an pek tur thu Sports Minister hi a hrilh nghal a ni.

Sports Minister hian Union Sports Minister Kiren Rijiju pawh kawmin Mizoram sawrkarin Sports tihhmasawn nana a hmalak mekna leh puih an ngaihna te a hrilh a. Tunhnaiah Mizoram rawtna anga Field 4 a Phullem phahna an pawmpui thar avangin amahah leh Sports Ministry chungah lawmthu a hrilh a ni. Robert-a rawt angin Union Minister Rijiju chuan Tokyo Olympics 2020 ah NE Sports Minister zawng zawngte leh an nupuite kalna leh Olympics chhim ho dan tur chu a tihsak tur thu a hrilh bawk.

Tourism Minister ni bawk Romawia Royte chuan Union Tourism Minister Pahlab Singh Patel pawh kawmin Mizoram Sawrkarin DPR alo submit tawhte sanction rang turin a ngen a, Mizoram tlawh vat tur leh Thenzawl Golf Course hawng turin a sawm bawk. Remchanlohna thar a awmloh chuan December thlatira Golf Course hawng tura Zoram tlawh a tum thu alo hrilha, Mizoram Tourism hmasawnna tura project te pawh sanction thuai an lo tum tur thu Mizoram Minister hi alo hrilh a ni.

Roberta hian Urban Ministry pawh tlawhin Mizoram Sorkar rawtna anga Sports, ICT leh Tourism hmasawnna atana sum tam tham tak Mizoram tan an sanction avangin lawmthu a hrilh a ni.

Minister hian nimina Sports Minister Conference New Delhi ah kumtir lama alo ngen tawh anga Football Field 2 leh Hockey Field 1 Sports Ministry in Mizoram a pek thar thu sawiin Fit Mizoram Movement leh Fit India Movement chungchangte, National School Games leh Khelo Youth Games inlak lawn dan turte leh Union Youth Affairs & Sports in ruahmanna ruhrel tam zawk dawng thei tura chutiang atana Budget Head thar siam a that a rinthu te a sawi a ni.

Union Youth Affairs Secretary Utma Chawdry pawh kawmin Mizorama NSS, NCC leh Bharat Scout & Guides chungchangte a sawipui a, Union Sports Secretary RS Julaniya pawh a kawm bawk.

Minister Roberta hian Mizoram Governor thar RS Sreedhan Pillai pawh New Delhiah kawmin Tourism leh Sports lama Mizoram hmasawn dan turte an sawi dun bawk.