Portugal chuan Pathianni zan khan Luxembourg laka 2-0-a chakin Euro 2020 khel turin an dinhmun an tichiang ta a, he match-ah hian Cristiano Ronaldo chuan goal thunin Portugal tana goal 99 a thunna a ni a, record thar siam a intiam zui nghal a ni.
He inkhelah hian Bruno Fernandes chuan Portugal goal hmasa zawk hi a thun a, hun tawp dawnah Ronaldo hian an chakna tichiang turin an goal hnihna hi a thun a, heti hian Group B-ah Portugal chu pahnihna an ni a, 2-2-a an group hmahruaitu Ukraine draw-tu Serbia chu pathumna niin, Portugal aiin point 3-in an hniam a ni.
Ronaldo hian kuminah Portugal tan goal 14 a thun tawh a, mipa zinga international goal thun tam ber Iran legend Ali Daei chuan goal 109 thunin record ding lai a siam mek a, Ronaldo chuan, “Record zawng zawng hi khûm a ni dawn a, he record hi ka khûm dawn a ni,” tiin a sawi a, mahse Ronaldo hian international goal 100 thun tling hmasa ber pahnihna ni tur pawhin nakum March thlaa international break awm leh hmasa ber tur a nghah leh phawt a la ngai dawn a ni.