Zothlifim Logo
Loading ...

Mizoram State Child Protection Society, Women & Child Development, Social Welfare Department leh Gauhati High Court, Aizawl Bench ṭangkawpten nimin khan Aijal Club-ah naupangte chunga hleilenna dona ni “World Day for the Prevention of Child Abuse” denchhenin naupang te himna chungchang leh an chunga hleilenna dolet dan tur sawihona ‘One Day Conference on Child Protection in Mizoram’ an buatsaih a, he conference hi Justice Michael Zothankhuma, Judge, Gauhati High Court leh Sangzuali Vanchhawng, Chairperson, Mizoram State Commission for Protection of Child Rights-ten an hmanpui a ni.

Justice Michael Zothan-khuma chuan duat leh hmangaih taka enkawl bakah, boruak ṭha leh him hnuaia seilen chu naupangte chanvo leh dikna a ni tih sawiin, naupangte chunga hleilenna hi thil thar a ni lova, hmanlai pawhin a awm reng tawh a, mahse chung hunah te chuan a hremna dân a awm lova, tunah erawh a hremna dân hrang hrang a awm tawh a, heti chung hian naupangte hian venhimna hi an la mamawh reng tho a ni, a ti a. Khawtlang-in mimal laka a phût leh beisei bakah khawtlang anga thil tih ‘social obligations’ te hi Mizo society-ah kan nei tam em a, hei hi a ṭha ber em tih kan ngaihtuah a pawimawhin ka hria, a ti bawk.

He hun hi Helen Dawng-liani, Registrar, Gauhati High Court, Mizoram Bench-in kaihruaiin mithiam thlan bik 4-ten naupang dikna leh chanvo, an himna leh a kaihhnawih chungchang, naupang vênna dân leh hrai chungchang paper an buatsaih chu zirho a ni a. Naupang venhimna chungchang a thawktu peng hrangten report an pek bakah naupang venhimna kawnga thawhho dan tur leh hmalak zel dan tur an sawiho bawk a ni.

World Day for Prevention of Child Abuse hi District hrang hrangah hman a ni bawk a, School hrang hrangah Naupangte hlim leh him taka an awm theihna tur leh venhim an nih tur thu ziak tar niin, District tinah Car flag sem a ni a, Aizawl ah chuan S.P Aizawl kaihruaina hnuaiah Police motor ah leh Police Station ah te flag hi tar niin, khawchhung hmun hrang hrangah he ni “World Day for Prevention of Child Abuse” denchhen in banner tar a ni bawk a ni.